პორტალი ადამიანის უფლებების შესახებ

გორის რაიონის სოფელ კარალეთში, პროფესიული მოვალეობის შესრულების დროს, შიდა ქართლის საინფორმაციო ცენტრის ხელმძღვანელი, ჟურნალისტი საბა წიწიკაშვილი ცემეს. ჟურნალისტს ფიზიკური შეურაცხყოფა კარალეთის რწმუნებულმა მიაყენა. საბა წიწიკაშვილი გორის საავადმყოფოშია მოთავსებული.

პოლიციამ „ქართული ოცნების“ პროგრამა „კარდაკარის“ რეგისტრატორი ილია სულიაშვილი 1 ივლისს დააკავა. იგი წვრილმანი ხულიგნობის ჩადენაში დაადანაშაულეს და სასამართლომ 35-დღიანი ადმინისტრაციული პატიმრობა შეუფარდა. ილია სულიაშვილს სხეულის დაზიანებები აქვს მიღებული.

მცხეთა-მთიანეთის საინფორმაციო ცენტრის ჟურნალისტმა გელა მთივლიშვილმა საქართველოს შინაგან საქმეთა მინისტრს ადმინისტრაციული საჩივრით მიმართა. ჟურნალისტი შსს–გან 2012 წლის 20 მაისს თიანეთის პოლიციის შესასვლელსა და მისაღებში დამონტაჟებული ვიდეოთვალის ჩანაწერების მიწოდებას ითხოვს.

კოალიცია „ქართული ოცნების“ მხარდამჭერები, რომლებმაც 1 ივლისს, მცხეთაში, აქციაში მიიღეს მონაწილეობა, პოლიციაში დაიბარეს. „ქართული ოცნების“ დუშეთის შტაბის უფროსის, დოდო ჩოხელის განცხადებით, სოფელ ქვეშეთის სკოლის დირექტორი კამილა ხევსურიშვილი კოალიციის მხარდამჭერებს სკოლიდან ბავშვების გარიცხვით ემუქრება.

აღსრულების ეროვნული ბიუროს ცნობით, 2 ივლისს ინტერნეტ აუქციონი გამოცხადდა ბიძინა ივანიშვილის დაყადაღებული აქციების 100%-ზე „ქართუ ჯგუფში“ და აქციების 21.7%-ზე „პროგრეს ბანკში" მას შემდეგ, რაც ოპოზიციური კოალიცია „ქართული ოცნების“ ლიდერმა გასულ თვეში დაკისრებული  მრავალმილიონიანი ჯარიმის გადახდაზე უარი თქვა.

სამართლის თემების გაშუქებისას ქართველი ტელეჟურნალისტები ძირითადად ორი ტიპის შეცდომას უშვებენ - არღვევენ უდანაშაულობის პრეზუმფციას და სიუჟეტის გმირების პირად ცხოვრებაში ერევიან - აღნიშნულია „მედიის განვითარების ფონდის“ (MDF) მიერ გამოქვეყნებულ კვლევის ანგარიშში, რომელიც 2 ივლისს გამოქვეყნდა.