მსჯავრდებულებს დაწესებულების მოსამსახურეებთან მხოლოდ "თქვენობით" მოუწევთ საუბარი

ადმინისტრაციული პატიმრობისას მსჯავრდებულებს დაწესებულების მოსამსახურეებთან მხოლოდ "თქვენობით" მოუწევთ საუბარი.

მსჯავრდებულის ვალდებულებები სასჯელაღსრულების, პრობაციისა და იურიდიული დახმარების საკითხთა მინისტრის ბრძანებით დამტკიცდა.
ბრძანების თანახმად, მსჯავრდებული ვალდებულია შეასრულოს დაწესებულების ადმინისტრაციის კანონიერი მოთხოვნები; დაიცვას საკნისა და პირადი სანიტარიულ-ჰიგიენური პირობები; დაიცვას ხანძარსაწინააღმდეგო უსაფრთხოების წესები; გაუფრთხილდეს დაწესებულების ქონებას; დაასუფთაოს სპეციალური საკანი რიგითობის დაცვით; არ განახორციელოს დაწესებულების მოსამსახურეთა და სხვა პირთა ღირსების დამამცირებელი მოქმედებები; არ გაუწიოს წინააღმდეგობა დაწესებულების მოსამსახურეებსა და სხვა პირებს თავიანთი სამსახურებრივი მოვალეობების განხორციელებისას; არ ჩაიდინოს ქმედებები, რომელიც ემუქრება მისი ან სხვა პირების სიცოცხლეს ან/და ჯანმრთელობას; ზრდილობიანად მოეპყროს დაწესებულების მოსამსახურეებსა და სხვა პირებს; დაწესებულების მოსამსახურეს მიმართოს "თქვენობითი" ფორმით; შეასრულოს მასზე დაკისრებული სხვა მოვალეობები.

ამ ვალდებულებების შეუსრულებლობის შემთხვევაში, მსჯავრდებულს ან საყვედურს გამოუცხადებენ და/ან ნებადართული ნივთებით სარგებლობის უფლებას შეუზღუდავენ. ასევე, შესაძლოა პირი ათ დღემდე ვადით სამარტოო საკანშიც გადაყვანონ.