ჯერ - ჯერობით დაუდგენელმა პირმა გურჯაანის მუნიციპალიტეტის ერთ - ერთი საჯარო სკოლის დამამთავრებელი კლასის მოსწავლეს მ. ა-ს ფიზიკური დაზიანებები მიაყენა. მოსწავლის ახლობლები მომხდარს სკოლის პედაგოგს უკავშირებენ.
მათი თქმით, როგორც გაარკვიეს, მასწავლებელი მოსწავლეს რამდენიმე თვის განმავლობაში არწმუნებდა, რომ ის ნაშვილები იყო და ბიოლოგიური მშობლების მოძებნაში დაეხმარებოდა. ამისათვის პედაგოგის მითითებით და დახმარებით მ. ა-მ საერთო ჯამში დაახლოებით 1000 აშშ დოლარამდე თანხა არაერთხელ ისესხა და მასწავლებლის მიერ ნაჩვენებ პიროვნებას გადასცა, რომელიც მ. ა-ს ადვოკატად გაეცნო.
როგორც "ადამიანის უფლებათა ცენტრისთვის" გახდა ცნობილი, მას შემდეგ, რაც მ. ა-მ მომხდარის შესახებ დედას გაანდო, მასწავლებლის მიერ მითითებული პირი, რომელსაც მ. ა. ადვოკატად იცნობდა, მას სკოლის მიმდებარე ტერიტორიაზე შეხვდა და გაჩუმება მოსთხოვა, ამასთან ერთად დაემუქრა და გოგონას განმარტებით მუცლის არეში დანით დასერა.
ერთ - ერთი ვერსიით, რაზედაც მ. ა-ს ახლობლები საუბრობენ, პედაგოგს გოგონას საზღვარგარეთ გაყვანა და მისი თურქეთში გაყიდვა სურდა. ამ მიზნით, პედაგოგი გოგონას ავტორიტეტის შემლახველ ცნობებს ავრცელებდა, თითქოს მას მშობლის თანატოლ მამაკაცთან ჰქონდა სექსუალური ურთიერთობა.
მომხდართან დაკავშირებით სისხლის სამართლის საქმე აღიძრა. გამოძიებას კახეთის საოლქო პროკურატურა აწარმოებს.
გელა მთივლიშვილი, კახეთი
ახალი ამბები
პოპულარული
რატომ ვერ იბრუნებენ კონფლიქტით დაზარალებული ოსები საქართველოს მოქალაქეობას და ქონებას?
სპეციალურ პენიტენციურ სამსახურს წამების მსხვერპლის სასარგებლოდ 50 000 ლარის გადახდა დაეკისრა
'ალბათ, ნებისმიერი რეგიონული ჟურნალისტი გეტყვით, რომ გადარჩენისთვის გვიწევს ბრძოლა!'
