კახეთის მუნიციპალიტეტებში, სახელმწიფო და საბიუჯეტო დაფინანსებაზე მყოფ სამსახურებში, რომლებიც 2008 წელს გაზეთ "იმედის" ხელმომწერები იყვნენ, 2009 წელს გაზეთის გამოწერაზე უარი თქვეს და მიზეზად ზემდგომიდან მიღებული მითითება დაასახელეს, - განაცხადეს კახეთის რეგიონალურ გაზეთ "იმედის" რედაქციაში.
გაზეთის გაყიდვების მენეჯერის ალბინა პილავოვას თქმით, ბოლო რამდენიმე დღის განმავლობაში, არაერთმა ფიზიკურმა და იურიდიულმა პირმა გაზეთის გაყიდვების აგენტებს პირად საუბარში უთხრა, რომ გაზეთის გამოწერის სურვილი აქვთ, თუმცა "ზემოდან მიღებული დავალების" გამო ვერ გამოიწერენ. მათივე თქმით, "მწვავე, კრიტიკული სტატიებით გამორჩეული გაზეთი რომ არ უნდა გამოიწერონ, ამის თაობაზე მითითება 9 იანვარს მიიღეს", ოღონდ საიდან და ვისგან, არ აკონკრეტებენ.
აღნიშნულს კახეთის გუბერნატორის პირველი მოადგილე გიორგი სიბაშვილი კატეგორიულად უარყოფს. მისი თქმით, ის თავად იწერს როგორც რეგიონულ ასევე რესპუბლიკურ გაზეთებს და სამხარეო ადმინისტრაციას არავისთვის მიუთითებია, რომ პრესა არ გამოიწეროს.
წყარო: მედიანიუსი