თელავის რეგიონალურმა საგადასახადო ინსპექციამ მცირე მეწარმეების მასობრივი დაჯარიმება დაიწყო.
საგადასახადო ინსპექტორები ინდივიდუალურ მეწარმეებს სალარო აპარატის არ ქონის ან მისი გამოუყენებლობის მიზეზით 500 ლარით აჯარიმებენ. დაჯარიმებულთა შორის გლეხებიც არიან, რომლებიც ქუჩაში სახელდახელოდ მოწყობილ დახლებზე ან ჯიხურებში საკუთარ ბოსტნეულს და ხილს ყიდიან.
ერთ-ერთი დაჯარიმებულის განცხადებით, რომელსაც პურის საცხობი აქვს, საგადასახადო ინსპექტორები საცხობში მაშინ შევიდნენ, როცა იქ მყოფი ორი მცხობელი თონეში პურს აკრავდა. ინსპექტორებმა ერთი პური იყიდეს, 50 თეთრი დადეს და გავიდნენ. ერთ წუთში ისინი უკან დაბრუნდნენ და სალარო აპარატის გამოუყენებლობის მიზეზით, საცხობი 500 ლარით დააჯარიმეს. საგადასახადო ინსპექტორებმა ამავე მეთოდით დააჯარიმეს კიდევ ერთი ინდმეწარმე, რომელიც სოფელ კალაურში, გზის პირას მდებარე ჯიხურში საკუთარ ნაკვეთში მოწეულ პომიდორს და ყურძენს ყიდის. ინსპექტორებმა 2 კილოგრამი ყურძენი შეიძინეს, 2 ლარი გადაიხადეს და მანქანაში ჩასხდნენ. რამდენიმე წუთის შემდეგ კი უკან დაბრუნდნენ და ინდმეწარმე დააჯარიმეს.
თელავის რეგიონალურ საგადასახადო ინსპექციაში ინდმეწარმეების მასობრივ დაჯარიმებასთან დაკავშირებით კომენტარს არ აკეთებენ.
კახეთის საინფორმაციო ცენტრი