სამართალდამცავებმა დააკავეს შრომის, ჯანმრთელობისა და სოციალური დაცვის სამინისტროს სოციალური სუბსიდიების სააგენტოს მომსახურების ცენტრის ისანი-სამგორის სამსახურის უფროსი ზვიად ჭინჭარაული და ამავე სამსახურის უფროსი სპეციალისტი გია ნადარაია.
ინფორმაცია დაკავების შესახებ სააგენტოს მომსახურების ცენტრის პრესსამსახურის თანამშრომელმა, ეკა ალავიძემ დაადასტურა.
მან აღნიშნა, რომ ოფიციალური ინფორმაცია იმასთან დაკავშირებით, თუ რატომ დააკავეს ჭინჭარაული და ნადარაია, არ მიუწოდებიათ.
„სამსახური ჩვეულ რეჟიმში გააგრძელებს მუშაობას. სამსახურის უფროსის მოვალეობას მოადგილე შეასრულებს. ვითანამშრომლებთ გამოძიებასთანაც“, -განაცხადა ალავიძემ და განმარტა, რომ დაკავების ფაქტი გუშინ მოხდა.
„ინტერპრესნიუსის“ ინფორმაციით, ჭინჭარაული და ნადარაია ქრთამის აღების ფაქტზე არიან დაკავებულები.
ამასთან, მთავარ პროკურატურაში ამ თემაზე დღეისთვის ბრიფინგი იყო დანიშნული, თუმცა ის გაურკვეველი მიზეზით გადაიდო. ბირიფინგის გადადების მიზეზე პროკურატურაში განმარტება არ გაუკეთებიათ.
წყარო: „ინტერპრესნიუსი“