პანკისის ხეობაში არსებულ სიტუაციას ექსპერტებთან და პოლიტიკოსებთან ერთად დღეს, საქართველოში აკრედიტებული დიპლომატიური კორპუსის წარმომადგენლებიც გაეცნობიან.
„ქრისტიან–დემოკრატების“ ინიციატივით შექმნილი სპეციალური მონიტორინგის ჯგუფი პანკისის ხეობაში დილით გაემგზავრება, ადგილზე შეხვდება მოსახლეობასაც და ადგილზევე გადაამოწმებს ბოლო დროს რუსი მაღალჩინოსნების მიერ გავრცელებულ ინფორმაციას, ხეობაში ტერორისტების არსებობის და გადამზადების შესახებ.
მონიტორინგის ჯგუფში შედიან უნგრეთის, დიდი ბრიტანეთის, გერმანიის, შვედეთის, უკრაინის, ჩინეთის, საფრანგეთის, ესტონეთის, ჩეხეთის, აშშ-ის, ირანის საელჩოების, ევროკომისიის, ევროსაბჭოს და ევროკავშირის წარმომადგენლები. პანკისში არსებულ სიტუაციას დღეს ასევე „BBC“-სა და „THE WASHINGTON POST“ –ის კორესპონდენტები გაეცნობიან.
ქართველ და უცხოელ ჟურნალისტებთან ერთად პანკისის ხეობაში დღეს რუსული მედია-საშუალებების „რია ნოვოსტისა“ და ტელეკომპანია „მირის“ წარმომადგენლებიც ჩავლენ.
რაც შეეხება ექსპერტებს, მონიტორინგის ჯგუფში ერთვებიან „თავდაცვისა და უსაფრთხოების“ საბჭოში შემავალი ექსპერტები, ასევე, ექსპერტი კავკასიის საკითხებში მამუკა არეშიძე და NDI-ის წარმომადგენლები.
მონიტორინგის ჯგუფის წევრები ხადორ-ჰესამდე შემოივლიან ყველა იმ ადგილს, სადაც თავის დროზე, 2001-02 წლებში შეიარაღებული დაჯგუფებები მართლაც იმყოფებობდნენ.
იგეგმება სოფლების დუისისა და ჯოყოლოს მონახულებაც.
წყარო: „ინტერპრესნიუსი“