პარლამენტი დღეიდან „ამნისტიის შესახებ“ კანონპროექტის განხილვას იწყებს, რომელიც ნარკომომხარებლებს შეეხებათ.
კანონპროექტით, თავისუფლების აღკვეთის სახით დანიშნული სასჯელის მოუხდელი ნაწილი გაუნახევრდებათ სისხლის სამართლის კოდექსის 260-ე მუხლის პირველი ნაწილით მსჯავრდებულ პირებს, რომლებმაც ჩაიდინეს ნარკოტიკული საშუალების, მისი ანალოგის ან პრეკურსორის უკანონო შეძენა, შენახვა ან გადაზიდვა.
ასევე, სასჯელის მოუხდელი ნაწილი გაუნახევრდებათ სისხლის სამართლის კოდექსის 273-ზე მუხლით მსჯავრდებულ პირებს.
ამასთან, თავისუფლების აღკვეთის სახით დანიშნული სასჯელის მოსახდელი ნაწილი გაუნახევრდებათ იმ პირებს, რომელთა მიმართაც ამნისტიის გამოცხადების დროს, აღნიშნული მუხლებით სისხლის სამართლებრივი დევნა ან სასამართლო განხილვა მიმდინარეობს.
ამნისტიის შესახებ კანონის საფუძველზე, დამატებითი სასჯელების შემცირება არ მოხდება და ასევე, გავრცელდება მხოლოდ თავისუფლების აღკვეთის სახით დანიშნულ სასჯელზე.
ამნისტია არ გავრცელდება პირობითი მსჯავრის სახით დადგენილ გამოსაცდელ ვადაზე.
დღეს „ამნისტიის შესახებ“ კანონპროექტს იურიდიული, ადამიანის უფლებათა და ჯანდაცვის საპარლამენტო კომიტეტები განიხილავენ. პლენარულ სხდომაზე კი მისი პირველი მოსმენით განხილვა, პარასკევს მოხდება.
წყარო: „ინტეპრესნიუსი“