საქართველოს ახალგაზრდა იურისტთა ასოციაციის თავმჯდომარე თამარ ხიდაშელი და საიას საერთაშორისო სამართლის ადვოკატები ცხინვალში უკანონოდ დაკავებული ქართველების ოჯახის წევრებს ხვდებიან. შეხვედრის მიზანია, საზოგადოებას ქართველების დაკავების ფაქტებთან დაკავშირებით დეტალური ინფორმაცია მიეწოდოს.
ცხინვალის რეჟიმის მიერ 17 სექტემბერს გორის რაიონის მცხოვრებლების - გიორგი არჩვაძის, ზვიად კობალაძის, დავით კაპანაძის და დემურ ჭიღლაძის დაკავებასთან დაკავშირებით საქართველოს ახალგაზრდა იურისტთა ასოციაციამ რუსეთის ფედერაციის წინააღმდეგ ადამიანის უფლებათა ევროპულ სასამართლოში სარჩელი შეიტანა.
როგორც საქართველოს ახალგაზრდა იურისტთა ასოციაციაში აცხადებენ, საია მიესალმება 2 დეკემბერს გიორგი რომელაშვილის და ალეკო ცაბაძის, ასევე ეროვნებით ოსი 5 პიროვნების განთავისუფლებას. თუმცა შეშფოთებით აღნიშნავს, რომ ე.წ. სამხრეთ ოსეთის ადმინისტრაციული საზღვრის მიმდებარე ტერიტორიიდან სამოქალაქო პირების უკანონო გატაცებისა და დაკავების ფაქტები განსაკუთრებით 2008 წლის აგვისტოს შეიარაღებული კონფლიქტის მომდევნო პერიოდში გახშირდა. შესაბამისად, აუცილებელია ყველა დაინტერესებული მხარის მიერ ისეთი პრევენციული ზომების გატარება, რომელიც მომავალში მსგავსი ფაქტების თავიდან აცილებას შეუწყობს ხელს.
ამასთან, საია სრულ მზადყოფნას გამოხატავს, უკანონო პატიმრობაში მყოფ სხვა პირებსა და მათი ოჯახის წევრებს სამართლებრივი დახმარება გაუწიოს.
წყარო: საინფორმაციო სააგენტო „პირველი“
ახალი ამბები
პოპულარული
რატომ ვერ იბრუნებენ კონფლიქტით დაზარალებული ოსები საქართველოს მოქალაქეობას და ქონებას?
სპეციალურ პენიტენციურ სამსახურს წამების მსხვერპლის სასარგებლოდ 50 000 ლარის გადახდა დაეკისრა
'ალბათ, ნებისმიერი რეგიონული ჟურნალისტი გეტყვით, რომ გადარჩენისთვის გვიწევს ბრძოლა!'
