თელავის მუნიციპალიტეტში 26-ვე ტერიტორიული ორგანოს რწმუნებული შვებულებაში გავიდა. ამის შესახებ კახეთის საინფორმაციო ცენტრს თელავის მუნიციპალიტეტის გამგებლის მოვალეობის შემსრულებელმა გიორგი ხატიაშვილმა განუცხადა.
„შვებულებაში ყველა გავიდა. მეტს ვერაფერს გეტყვით. მოქალაქეთა მიღება მაქვს და არ მცალია“, - განაცხადა გიორგი ხატიაშვილმა.
თელავის მუნიციპალიტეტის გამგებლის მოადგილის დავით ქსოვრელიშვილის განცხადებით, ტერიტორიული ორგანოების რწმუნებულები შვებულებაში იმის გამო გავიდნენ, რომ ზოგიერთი კენჭს იყრის, ზოგი კი წინასაარჩევნო კამპანიაშია ჩართული.
„26 ტერიტორიული ორგანო გვაქვს. აქედან 4 ქალაქ თელავში და 22 სოფლებში. შვებულებაში ყველა რწმუნებული გავიდა“, - აღნიშნა დავით ქსოვრელიშვილმა.
შვებულებაში გასვლის შესახებ განცხადებები დაწერეს ყვარლის მუნიციპალიტეტის გამგეობის ტერიტორიული ორგანოების რწმუნებულებმაც. ყვარლის მუნიციპალიტეტის გამგებლის მოვალეობის შემსრულებლის გია ცინცაძის განცხადებით, რწმუნებულები შვებულებაში 1 მაისიდან გავლენ.
დედოფლისწყაროში 1 რწმუნებულია შვებულებაში გასული, სიღნაღში - 2.
კახეთის საინფორმაციო ცენტრი