ახმეტის მუნიციპალიტეტის სოფელ ქვემო ომალოში „ნაციონალური მოძრაობის“ წარმომადგენლები სოციალურად დაუცველებს, იმ შემთხვევაში თუ ისინი არჩევნებში ხმას „ნაციონალურ მოძრაობას“ არ მისცემენ, სოციალური დახმარებების მოხსნით ემუქრებიან. ამის შესახებ ინფორმაციას არასამთავრობო ორგანიზაცია „ადამიანის უფლებათა ცენტრი“ ავრცელებს.
უფლებადაცვითი ორგანიზაციის ინფორმაციით, მათ წარმომადგენლებს მუქარის ფაქტი ქვემო ომალოს მაცხოვრებლებმა დაუდასტურეს.
ამომრჩევლებზე ზეწოლას უარყოფს სახელისუფლებო პარტიის ახმეტის საარჩევნო შტაბის წარმომადგენელი, მუნიციპალიტეტის გამგებელი კობა მაისურაძე. მისი თქმით, ზეწოლის შესახებ გავრცელებული ინფორმაცია სიმართლეს არ შეესაბამება.
კახეთის საინფორმაციო ცენტრი