გაძვირებული ცხოვრება

მსოფლიო ბაზარზე ხორბალზე ფასის მომატებამ გავლენა ახალციხის ბაზარზეც მოახდინა. ჯერ კიდევ ერთი კვირის წინ, ტომარა ფქვილის შეძენა, რომელიც ახლა 43 ლარი ღირს, 40 ლარად იყო შესაძლებელი.

სოფლის მეურნეობის სამინისტროში პურის ფასების ზრდას მსოფლიო ბაზარზე პურის დეფიციტითა და გლობალური სტიქიური უბედურებებით ხსნიან, თუმცა ფიქრობენ, რომ ფასების დარეგულირება აუცილებლად მოხდება.

„ეს მარტო საქართველოს პრობლემა არ არის, ეს მსოფლიოს პრობლემაა. მართალია, გაზრდილია ხორბლის წარმოება, მაგრამ ასევე იზრდება მისი მოხმარებაც“, - განაცხადა სოფლის მეურნეობის მინისტრის მოადგილემ ალეკო ცინცაძემ.

ინდმეწარმეები, რომლებიც ფქვილით ვაჭრობენ, ამბობენ, რომ ფასების ზრდის ტენდენცია უკვე ორი თვეა, რაც შეინიშნება. 

„წელიწადის ამ სეზონზე ფქვილის ფასი ყოველთვის იკლებს, რადგან მოსავლის აღების სეზონია. თუმცა წელს ფასები დაკლების ნაცვლად იზრდება“, - ამბობს ინდმეწარმე თამაზ ზედგინიძე.