ოთხშაბათს, 21 ოქტომბერს, 13:00 საათზე, საქართველოს რეგიონებში მომუშავე ჟურნალისტები, აჭარის ტელეკომპანია „25-ე არხის“ მხარდასაჭერად, თბილისში, პარლამენტის შენობის წინ შეიკრიბებიან.
ჟურნალისტები ტელეკომპანიისთვის დაკისრებული იმ ვალების ჩამოწერას ითხოვენ, რომელიც „25-ე არხს“ იმ პერიოდზე დააკისრეს, როცა აჭარაში, ასლან აბაშიძის მმართველობის დროს, ტელეკომპანია მეპატრონეებს წართმეული ჰქონდათ.
ამავე დღეს, ტელეკომპანია „25-ე არხის“ მხარდასაჭერად აქციები გაიმართება საფრანგეთის ქალაქ ლილშიც, მოგვიანებით კი, 29 ოქტომბერს, ევროსამიტის დროს, ბრიუსელში. უცხოელ ჟურნალისტებს სამსახურებრივი მოვალეობის შესრულებისას, ყველა შეხვედრასა და პრესკონფერენციაზე, მხარდაჭერის ნიშნად, მკერდზე აჭარის ტელეკომპანია „25-ე არხის“ ლოგო ექნებათ მიმაგრებული.
აქციას „ადამიანის უფლებათა ცენტრის“ ჟურნალისტებიც შეუერთდებიან.
დამატებითი ინფორმაციისათვის შეგიძლიათ დაუკავშირდეთ ჩვენი ორგანიზაციის კახეთის რეგიონული ოფისის კოორდინატორსა და ჟურნალისტ გელა მთივლიშვილს – 877 528 808, ან სხვა საკონტაქტო პირებს: ია მამალაძე – 899 373 375, ია ბობოხიძე – 899 740 760.