ინტერნეტ ტელევიზია itv.ge-ს ამიერიდან უხელმძღვანელებს გიორგი კაპანაძე - ხელისუფლებასთან ასოცირებული ტელეკომპანია „რეალტივის“ ყოფილი წამყვანი და გაზეთ droni.ge-ს დამფუძნებელი.
ინტერნეტ-ტელევიზია ეკუთვნის „ინტერნეტ მედია ჯგუფს“ - საქართველოში ყველაზე მსხვილ პროვაიდერული კომპანია „კავკასუს ონლაინის" შვილობილს, რომელიც ფლობს პოპულარულ გასართობ საიტებს, ასევე საინფორმაციო პორტალ presa.ge-ს, რომელსაც კაპანაძე itv.ge-სთან ერთად უხელმძღვანელებს.
გიორგი კაპანაძემ ინტერნეტ-ტელევიზიის გენერალური დირექტორის თანამდებობაზე პაატა ცაგარეიშვილი შეცვალა.
კაპანაძემ Media.Ge-ს განუცხადა, რომ მისი ხელმძღვანელობის ქვეშ ხსენებული ონლაინ-რესურსების დამოუკიდებელი სარედაქციო პოლიტიკა არ შეიცვლება.
„არ ვგეგმავ არანაირ ძირეულ ცვლილებებს. ყველაფერი დარჩება ისევ ისე, როგორც ჩემს მოსვალმდე იყო. შევეცდები იმას, რომ presa.ge და ინტერნეტ-ტელევიზია უფრო პოპულარული გახდეს“, - თქვა კაპანაძემ.
ლანა ბერიძე, მედია.გე