უცხოური საინფორმაციო საშუალებები კახეთში უშუქოდ დარჩენილი სოფლებით დაინტერესდნენ. კახეთის საინფორმაციო ცენტრის რედაქტორის გელა მთივლიშვილის განცხადებით, გადამღები ჯგუფები კახეთში ჩასვლას და სიუჟეტების მომზადებას იანვარში გეგმავენ.
მისივე თქმით, უშუქოდ დარჩენილი სოფლების შესახებ უცხოური საინფორმაციო საშუალებებისთვის ცნობილი კახეთის საინფორმაციო ცენტრის მასალებიდან გახდა. უცხოელი ჟურნალისტების ინტერესი პრობლემის მიმართ ადგილობრივი ხელისუფლების და „კახეთის ენერგოდისტრიბუციის“ დამოკიდებულებამ გამოიწვია, სადაც ისინი ამბობენ, რომ ასეთ სოფლებში რამდენიმე ოჯახი ცხოვრობს და თანხის დახარჯვა არ ღირს.
შეგახსენებთ, რომ კახეთში 20 წელია ელექტროენერგიის გარეშეა დარჩენილი ახმეტის რაიონის სოფელი ჭართალა და 16 წელია ელექტროენერგია არ მიეწოდება გურჯაანის რაიონის სოფელ ჭერემს.
კახეთის საინფორმაციო ცენტრი სოფლებში არსებულ პრობლემებზე რეპორტაჟებს ფონდ „ღია საზოგადოება საქართველოს“ მხარდაჭერით ამზადებს.
იხილეთ ვიდეორეპორტაჟი ჭართალადან: http://ick.ge/ka/videogallery/1632-2010-06-08-13-43-44.html
ფოტორეპორტაჟი ჭერემიდან: http://ick.ge/ka/photogalleries/508---16----.html
კახეთის საინფორმაციო ცენტრი