თბილისის საქალაქო სასამართლო humanrights.ge-ს სტატიას ეხმაურება
8 თებერვალი, 2011
თბილისის საქალაქო სასამართლომ ადამიანის უფლებათა ცენტრს დიღმის ტყეპარკის სტატუსის შეცვლის თაობაზე 31 იანვარს გამოტანილ გადაწყვეტილებაზე განმარტება გამოუგზავნა.
შეგახსენებთ, რომ მოსარჩელე მხარე - ანა გაბრიაძე და „კავკასიის გარემოსდაცვითი არასამთავრობო ორგანიზაციების ქსელი“ ასაჩივრებდა ქალაქ თბილისის საკრებულოს გადაწყვეტილებას, რომლის მიხედვითაც დიღმის ტყეპარკის ნაწილს სარეკრეაციო ზონის სტატუსი შეეცვალა და საზოგადოებრივ-საქმიანი ზონად იქცა.
თბილისის საქალაქო სასამართლომ სარჩელი არ დააკმაყოფილა. ამ სასამართლო პროცესის შესახებ, humanrights.ge-მ სტატია გამოაქვეყნა ( http://www.humanrights.ge/index.php?a=main&pid=12884&lang=geo ). საქალაქო სასამართლოს წერილიც სწორედ ამ სტატიაში გამოქვეყნებულ ინფორმაციას ეხება:
„თბილისის საქალაქო სასამართლო ეხმაურება საინფორმაციო სააგენტოს მიერ გავრეცლებულ ინფორმაციას დიღმის ტყე-პარკის ერთი ნაწილის სტატუსის ცვლილებასთან დაკავშირებით.
2011 წლის 31 იანვარს სასამართლომ არ დააკმაყოფილა ანა გაბრიაძისა და კავკასიის გარემოსდაცვითი არასამთავრობო ორგანიზაციების ქსელის სარჩელი თბილისის საკრებულოს 2009 წლის 11 სექტემბრის #10-24 გადაწყვეტილების ბათილად ცნობის შესახებ.
ამ გადაწყვეტილებით, დიღმის ტყე-პარკის ნაწილს შეეცვალა სტატუსი „სარეკრეაციო ზონა 1“ „საზოგადოებრივ-საქმიან ზონა 2“-ად. სასამართლო გადაწყვეტილება ემყარება იმას, რომ მითითებული ცვლილება განხორციელდა სხვადასხვა პირების საკუთრების კონსტიტუციური უფლების დაცვის მიზნით. დიღმის ტყე-პარკის სტატუსშეცვლილ ნაწილზე ფაქტობრივად განთავსებულია სხვადასხვა დანიშნულების შენობა-ნაგებობები, რომლებიც, დიღმის ტყე-პარკის მთელ ტერიტორიასთან ერთად, საჯარო რეესტრში რეგისტრირებულია კერძო საკუთრებად. ამასთან, ამა თუ იმ ტერიტორიის სტატუსის ცვლილება არ გულისხმობს ამ ტერიტორიაზე არსებული მწვანე საფარის ავტომატურ და უკონტროლო განადგურებას“.
humanrights.ge
ახალი ამბები
პოპულარული
სტატია
13 თებერვალი, 2024
სტატია
28 დეკემბერი, 2023
სტატია
13 დეკემბერი, 2023