ისრაელის პრეზიდენტი შიმონ პერესი მიხეილ სააკაშვილს დაკავებული ბიზნესმენების გათავისუფლების თხოვნით მიმართავს. ეს განცხადება ებრაულ გამოცემა „ედიოტ ახრონოტთან“ საუბრისას, ზეევ ფრენკელისა და რონი ფუქსის ქალიშვილებმა გააკეთეს.
„პრეზიდენტი შიმონ პერესი აპირებს თხოვოს ქართველ კოლეგას მათი გათავისუფლების შესახებ, არ ვიცით, შეიძლება მიმართა უკვე კიდეც - ჩვენ ველოდებით“, - აღნიშნეს დაკავებული ბიზნესმენების ქალიშვილებმა.
მათივე თქმით, ფრენკელსა და ფუქსს თვეში სამი სატელეფონო საუბრის უფლება აქვთ, თუმცა ციხის ადმინისტრაცია ამ წესებს არ იცავს. მათივე ინფორმაციით, ფრენკელი ხშირად აგზავნის წერილებს ისრაელში, თუმცა ადრესატამდე მას საქართველოს ხელისუფლების არაერთი წარმომადგენელი კითხულობს.
ბიზნესმენები 2010 წლის ოქტომბერში საქართველოს ფინანსთა მინისტრის მოადგილისთვის ქრთამის შეთავაზების ბრალდებით დააკავეს. სასამართლომ რონი ფუქსს 7-წლამდე, ხოლო ზეევ ფრენკელს 6-წლამდე თავისუფლების აღკვეთა მიუსაჯა.
ინტერპრესნიუსი