შინაგან საქმეთა სამინისტროს გენერალურმა ინსპექციამ დუშეთის პოლიციის უფროსი ვახტანგ დიდიძე და პოლიციის თანამშრომლები ლევან კოხრეიძე და ზურაბ ყორბესაშვილი დააკავა.
მცხეთა-მთიანეთის საინფორმაციო ცენტრის ინფორმაციით, დაკავების ოპერაცია 23 ივნისს, შუადღეს, დუშეთის ცენტრში ჩატარდა. დაკავებას გენერალური ინსპექციის უფროსი გიორგი გეგეჭკორი ხელმძღვანელობდა. გავრცელებული ინფორმაციით, პოლიციის თანამშრომლებს ბრალად ქრთამის აღება ედებათ. ისინი შს დუშეთის სამმართველოში ვაკანტურ ადგილზე დანიშვნაში დახმარების სანაცვლოდ მოქალაქისგან თანხას ითხოვდნენ.
დაკავებიდან რამდენიმე საათის შემდეგ დუშეთის პოლიციის უფროსი ვახტანგ დიდიძე და ამავე სამმართველოს დეტექტივ-გამომძიებელი ლევან კოხრეიძე გაათავისუფლეს. დუშეთის პოლიციის უფროსმა თანამდებობა უკვე დატოვა. ზურაბ ყორბესაშვილს კი წინასწარი პატიმრობა შეეფარდა.
მომხდართან დაკავშირებით გამოძიებას შსს-ს გენერალური ინსპექცია აწარმოებს.
მცხეთა-მთიანეთის საინფორმაციო ცენტრი