დუშეთში ტონობით წყალი იღვრება, მუშების გაფიცვა გრძელდება

დუშეთში, რუსთაველის ქუჩაზე, სასმელი წყლის დაზიანებული მილიდან ტონობით წყალი იღვრება. როგორც რუსთაველის ქუჩის მაცხოვრებლებმა მცხეთა - მთიანეთის საინფორმაციო ცენტრს განუცხადეს, მოსახლეობას წყალი კვირაში ორჯერ რამდენიმე საათით მიეწოდება, დაზიანებულ მილს კი ყურადღებას არავინ აქცევს.

„მილია დაზიანებული და გუბეები დგას. დუშეთის წყალმომარაგების სერვის-ცენტრს მივმართეთ, მაგრამ პრობლემა ჯერ არ მოუგვარებიათ,“- აღნიშნა რუსთაველის ქუჩაზე მცხოვრებმა ნათელა ვერძეულმა.

საქართველოს გაერთიანებული წყალმომარაგების კომპანიის დუშეთის სერვის-ცენტრის დირექტორი ვახტანგ ყიფშიძე კომენტარს არ აკეთებს.

შეგახსენებთ, რომ წყალმომარაგების კომპანიის დუშეთის სერვის ცენტრის სამსახურის ტექნიკური განყოფილება პარალიზებულია. ათზე მეტი მუშა პროტესტის ნიშნად გაფიცულია. ისინი სერვის-ცენტრის ხელმძღვანელს გულგრილობასა და კორუფციაში ადანაშაულებენ და თანამდებობიდან მის გადადგომას ითხოვენ.

მცხეთა-მთიანეთის საინფორმაციო ცენტრი