21 ოქტომბერს „შერატონ მეტეხი პალასში“ წიგნის - „მესხები: გზა შინისაკენ...“ პრეზენტაცია გაიმართა. წიგნის ავტორები არიან: გიორგი თარხან-მოურავი, ფორესტ კილიმნიკი და ტომ ტრიერი.
ავტორებმა წიგნი სამ ენაზე გამოსცეს: ქართულად, რუსულად და ინგლისურად. „მესხები: გზა შინისაკენ...“ სამ ნაწილადაა დაყოფილი და მოიცავს დეპორტირებულ ხალხთა ისტორიას, მათი სათვისტომოების დღევანდელ მდგომარეობას და ასევე - რეპატრიაციისა და ინტეგრაციის პრობლემებს. წიგნი მდიდარია ინფორმაციული ჩანართებით, ცხრილებით, რუქებითა და ფოტოსურათებით.
წიგნის გამოსაცემად საჭირო კვლევები და მოსამზადებელი სამუშაოები ჩატარდა პროგრამის - „1940-იან წლებში საქართველოდან დეპორტირებულ პირთა და მათი შთამომავლების რეპატრიაციის ხელშეწყობა“ ფარგლებში. აღნიშნულ პროგრამას ევროკავშირი აფინანსებს.
ტომ ტრიერი 2005 წლიდან საქართველოში მოღვაწეობს და ECMI-ის რეგიონალური წარმომადგენელია. მისი თქმით, ამ წიგნის გამოცემა მის ცხოვრებაში წარმატებული ნაბიჯია.
„მესხები: გზა შინისაკენ...“ წიგნის მაღაზიებში უკვე იყიდება და ყველა მსურველისთვის ხელმისაწვდომია.
მარიამ ხურციძე