ბიზნესმენი ბიძინა ივანიშვილი კახა კალაძის „პროგრესბანკის“ 10%-იანი წილის მფლობელი გახდა. ამის შესახებ „ინტერპრესნიუსს“ ბანკ „ქართუს“ პრეზიდენტმა ნოდარ ჯავახიშვილმა განუცხადა.
მისი თქმით, ბანკ „ქართუსა“ და „პროგრესბანკს“ შორის 7 ნოემბერს ურთიერთთანამშრომლობის მემორანდუმი გაფორმდა.
„შევთანხმდით ტექნიკურ თანამშრომლობაზე. საჭიროების შემთხვევაში ჩვენ, როგორც უფრო გამოცდილი ბანკი, დავეხმარებით კადრების მომზადებაში, გავუზიარებთ გამოცდილებას. აუცილებლობის შემთხვევაში, გარკვეულ ფინანსურ თანადგომასაც გამოვუცხადებთ“,- აღნიშნა ჯავახიშვილმა.
მისივე თქმით, ბანკებს შორის თანამშრომლობის გაფორმებიდან მალევე „პროგრესბანკში“ შემოწმება ეროვნულმა ბანკმა დაიწყო.
ეროვნული ბანკი კალაძის ბანკში შემოწმების დაწყებას ადასტურებს, თუმცა დეტალებს არ აკონკრეტებს.
„ეს ინფორმაცია კონფიდენციალურია და, აქედან გამომდინარე, ეროვნული ბანკი კომენტარს არ გააკეთებს“, - განუცხადეს „ინტერპრესნიუსს“ ეროვნული ბანკის პრესცენტრში.
ინტერპრესნიუსი