სირიიდან აფხაზეთში ჩასახლება ექვს ოჯახს სურს. ამის შესახებ სააგენტო „აპსნი პრესი“ იუწყება. აფხაზეთში რეპატრიაციის მსურველ ოჯახებთან შეხვედრა აფხაზეთის დე-ფაქტო ხელისუფლების მისიამ შეძლო, რომელიც სირიაში იმყოფებოდა. აფხაზური დიასპორის წარმომადგენლებმა მისიასთან შეხვედრაზე განაცხადეს, რომ ამ ეტაპზე დაუყოვნებლივი მასიური რეპატრიაცია შეუძლებელია.
20-ზე მეტმა ადამიანმა კი გამოთქვა სურვილი, ვითარების გასაცნობად და გადაწყვეტილების მისაღებად აფხაზეთში ჩავიდეს. მათ ასევე სურთ, შეუტყონ, ამართლებს თუ არა აფხაზური საზოგადოება მათ შესაძლო დაბრუნებას. დე-ფაქტო საგარეო საქმეთა სამინისტროს პრესსამსახურის ინფორმაციით, მთლიანობაში აფხაზური დისპორის წარმომადგენლებმა მადლიერებით მიიღეს აფხაზური დელეგაციის ვიზიტი და მათ ყურადღებისთვის მადლობა გადაუხადეს.
მისიამ სირიაში ყოფნისას შემდეგი აფხაზური გვარების წარმომადგენლებთან შეძლო შეხვედრა – აბაზა, აგრბა, მარშჩანი, გეჩბა, ჩიჩბა, ანქვაბი, მაანი, კუჯბა, პატეიპა, ლეიბა, არიუტაა, ცვიჟბა. სირიაში აფხაზური დიასპორის დახმარების მიზნით დე-ფაქტო ხელისუფლება მუშაობას აგრძელებს.
დელეგაცია სირიიდან თურქეთში ჩავიდა, სადაც ასევე შეხვდა აფხაზური დისაპორის წარმომადგენლებს.
დელეგაციას რეპატრიაციის დე-ფაქტო სახელმწიფო კომიტეტის თავმჯდომარე ზურაბ ადლეიბა ხელმძღვანელობდა, შემადგენლობაში კი დე-ფაქტო საგარეო საქმეთა სამინისტროს თურქეთისა და ახლო აღმოსავლეთის განყოფილების უფროსი ინარ გიცბა და თურქეთში აფხაზეთის კულტურული ცენტრების ფედერაციის პრეზიდენტი ფერიდუნ აკუსბა შედიოდნენ.
აფხაზეთის დე-ფაქტო ხელისუფლება გეგმავს, სირიაში პოლიტიკური კრიზისის ფონზე საჭიროების შემთხვევაში აფხაზური დიასპორის წარმომადგენელთა აფხაზეთში ჩასახლებას ხელი შეუწყოს. ვითარების ადგილზე შესწავლის მიზნით აფხაზური დელეგაცია სირიაში ხუთდღიანი ვიზიტით 15 იანვარს გაემგზავრა.
ინტერპრესნიუსი