თბილისში არსებული ქონების პრივატიზებასთან დაკავშირებით, ქალაქის მთავრობის კომპეტენციები იზრდება. ცვლილება „საქართველოს დედაქალაქის – თბილისის შესახებ“ კანონში შედის.
კანონის მოქმედი რედაქციით, პრივატიზებასთან დაკავშირებით, ქალაქის მთავრობას მხოლოდ ადგილობრივი საკუთრების ქონების პრივატიზება და მართვა, ამ ქონების დაცვა და მოვლა-პატრონობა ევალება.
კანონპროექტით კი, ქალაქის მთავრობის ფუნქციებს, ქალაქ თბილისის თვითმმართველი ერთეულის ქონების საპრივატიზებო საწყისი ფასის განსაზღვრაც ემატება.
ამას გარდა, ქალაქის მთავრობის კომპეტენციებს ემატება პრივატიზებული ან/და სარგებლობის უფლებით გადაცემული ქონების მიმღები პირის ფინანსური და საინვესტიციო ვალდებულებების შესრულებისგან გათავისუფლებასთან დაკავშირებული საკითხების განხილვა.
კანონპროექტის ავტორი და ინიციატორია დეპუტატი ვახტანგ ბალავაძე.
ინტერპრესნიუსი