3 თებერვალს, სასტუმრო Holiday inn-ში 10:00 საათიდან 13:00 საათამდე გაიმართება მრგვალი მაგიდა. ადამიანის უფლებათა ცენტრი წარმოადგენს საქართველოში შეკრების თავისუფლების პრაქტიკული განხორციელების მონიტორინგის შედეგებს.
ადამიანის უფლებათა ცენტრის ანგარიში - „საქართველოში მშვიდობიანი შეკრების თავისუფლების მონიტორინგი“ მოიცავს მონიტორინგის პერიოდს 2011 წლის 1 იანვრიდან 30 ივნისამდე.
ანგარიშში საუბარია ამ პერიოდში ჩატარებულ საპროტესტო აქციებზე დაფიქსირებულ დარღვევებზე, მათ შორის: „აგვისტოს ხუთი დღის“ პრემიერის დღეს დემონსტრაციის აღკვეთის ფორმებზე; გმირთა მოედანზე ვეტერანთა შიმშილობის აქციის ჩახშობაზე; „სახალხო კრების“ მიერ ორგანიზებულ საპროტესტო აქციებზე; 26 მაისის მასშტაბური საპროტესტო აქციის დაშლაზე და ა. შ.
ანგარიშში წარმოდგენილია შეკრების თავისუფლებასთან დაკავშირებული საკანონმდებლო და ემპირიული საკითხების ანალიზი; ასევე - ქვეყანაში ბოლოდროინდელი ტენდენციის მიმოხილვა.
ანგარიში ეფუძნება საქართველოს 5 ქალაქიდან და რეგიონული ცენტრიდან 25 მონიტორის მიერ მოწოდებულ ემპირიულ მონაცემებს. მონიტორებმა გაიარეს OSCE/ODIHR-ისა და ევროსაბჭოს ექსპერტების მიერ შეკრების თავისუფლების შესახებ ჩატარებულ ტრენინგები.
პროექტი - „საქართველოში უფლებადამცველების უნარების განვითარება შეკრების თავისუფლების მონიტორინგის შესახებ“ განხორციელდა ეუთოს დემოკრატიული ინსტიტუტებისა და ადამიანის უფლებების ოფისის OSCE/ODIHR, ასევე - ევროპის საბჭოს მხარდაჭერით.
პროექტის მიზანი იყო, დახმარებოდა უფლებამდაცველებს, განევითარებინათ საქართველოში მშვიდობიანი შეკრების თავისუფლების მონიტორინგის უნარები.
ადამიანის უფლებათა ცენტრი