საკაბელო ტელევიზია „გლობალ TV“-ის აბონენტებისთვის ტელეკომპანია „რუსთავი 2“-ის მაუწყებლობა 27 მარტიდან შეწყდება. ამის შესახებ „ინტერპრესნიუსს“ „გლობალ TV“-ის განვითარებისა და მარკეტინგის დირექტორმა, ზურაბ ბაზლიძემ განუცხადა.
მისივე თქმით, ტელეკომპანია „იმედის“ შემდეგ, „გლობალ TV“-მ სამაუწყებლო კომპანია „რუსთავი 2“-ისგან მიიღო წერილი, რომელიც 27 მარტიდან „გლობალ TV“-ის მეშვეობით მაუწყებლობის შეწყვეტას ითხოვს.
ზურაბ ბაზლიძის განცხადებით, საკუთარ წერილში „რუსთავი- 2“-მა გათიშვის მოთხოვნის მიზეზად საკაბელო ტელევიზია „კავკაზუს TV“-სთან თანამშრომლობა დაასახელა, ტელეკომპანია „იმედმა“ კი - „ბლექსი სატისთან“ თანამშრომლობა, რომელიც ამ ეტაპზე არ მაუწყებლობს.
ბაზლაძის თქმით, ნაციონალური არხების მხრიდან ეს ტენდენცია მას შემდეგ დაიწყო, რაც 9 მარტს „გლობალ TV“-მ კომუნიკაციების მარეგულირებელ ეროვნულ კომისიას აცნობა, რომ ტელეკომპანია „მე-9 არხთან“ მაუწყებლობის შესახებ ხელშეკრულება გაფორმდა.
ზურაბ ბაზლიძეს მიაჩნია, რომ ტელეკომპანიების ეს ნაბიჯი მომხმარებლების უფლებებს არღვევს. მისივე ინფორმაციით, მიუხედავად ამისა, „გლობალ TV“-ში აბონენტთა გადინება ამ დროისთვის არ ფიქსირდება. აბონენტების შენარჩუნების მიზნით, კომპანია ახალი სატარიფო პაკეტებისა და მომხმარებლებისთვის სხვა ტელეკომპანიების შეთავაზებას გეგმავს.
საკაბელო ტელევიზია „გლობალ TV“-ის აბონენტებისთვის ტელეკომპანია „იმედის“ ტრანსლირება 15 მარტიდან შეწყვეტილია.
ინტერპრესნიუსი