პორტალი ადამიანის უფლებების შესახებ

კოალიცია „ქართული ოცნების“ დედოფლისწყაროს რაიონული შტაბის ოფის - მენეჯერი აკაკი ნატროშვილი სამსახურიდან გაათავისუფლეს. აკაკი ნატროშვილი დედოფლისწყაროს საკრებულოს მიერ დაფუძნებულ კულტურისა და სპორტის ცენტრში მწვრთნელად მუშაობდა და სოფელ ზემო მაჩხაანში ბავშვებს ფეხბურთში ავარჯიშებდა.

„10 წელი ბავშვებს უფასოდ ვავარჯიშებდი. 2010 წლის დეკემბრიდან ხელფასი დამინიშნეს 200 ლარი, ხელზე 160 ლარს ვიღებდი. აპრილის შუა რიცხვებში სამსახურის უფროსმა ივანე შანშიაშვილმა დამიბარა და მითხრა, ან „ქართული ოცნებიდან“ უნდა წამოხვიდე ან ჩვენგან უნდა წახვიდეო. იქიდან არ წამოვალ მეთქი. მაშინ აქედან წასვლაზე განცხადება დაწერეო. უარი ვუთხარი. ჯერ არ ვწერდი. ბოლოს მაინც დავწერე. სამსახურიდან 18 აპრილს გამათავისუფლეს“, - განუცხადა აკაკი ნატროშვილმა კახეთის საინფორმაციო ცენტრს.

დედოფლისწყაროს კულტურისა და სპორტის ცენტრის ხელმძღვანელმა ივანე შანშიაშვილმა კახეთის საინფორმაციო ცენტრთან კომენტარი არ გააკეთა.

შეგახსენებთ, რომ „ქართულ ოცნებასთან“ თანამშრომლობის გამო დედოფლისწყაროში საბიუჯეტო ორგანიზაციებიდან უკვე არაერთი ადამიანი გაათავისუფლეს.