მრგვალი მაგიდა - „ადვოკატთა ინსტიტუციური დევნა საქართველოში“

11 მაისს, 12:00-დან 15:00 საათამდე, საქართველოს ადვოკატთა ასოციაციის ოფისში, თბილისის ადამიანის უფლებათა სახლის ინიციატივით, გაიმართა მრგვალი მაგიდა თემაზე: ადვოკატთა ინსტიტუციური დევნა საქართველოში.

მრგვალი მაგიდა სამუშაო ხასიათისა იყო და მასში მხოლოდ უფლებადამცველი არასამთავრობო ორგანიზაციები და ადვოკატები მონაწილეობდნენ.

მრგვალი მაგიდა საქართველოს ადვოკატთა ასოციაციის მხარდაჭერით გაიმართა. შეხვედრას ესწრებოდა პარლამენტის ადამიანის უფლებათა კომიტეტის თავმჯდომარის მოადგილე, დიმიტრი ლორთქიფანიძე და სახალხო დამცველის აპარატის მართლმსაჯულების დეპარტამენტის უფროსი ირაკლი მჟავანაძე.

მრგვალი მაგიდის მიზანი იყო, უფლებადამცველებს და ადვოკატებს ერთად ემსჯელათ ადვოკატთა საქმიანობის სფეროში არსებულ მდგომარეობაზე და გაეუმჯობესათ კომუნიკაცია როგორც ერთმანეთთან, ასევე საზოგადოებასთან. ამავე დროს, მონაწილეებმა დაგეგეს სამოქმედო სტრატეგია და კამპანია ადვოკატთა ინსტიტუციური დევნის წინააღმდეგ, რათა სამოქალაქო აქტიურობის გაძლიერების გზით, მეტი გავლენა მოახდონონ ქართულ მართლმსაჯულებაში მიმდინარე შემაშფოთებელ პროცესებზე. 

მრგვალ მაგიდაში მონაწილეობდნენ თბილისის ადამიანის უფლებათა სახლის წევრი ორგანიზაციები - ადამიანის უფლებათა ცენტრი და „კონსტიტუციის 42-ე მუხლი“. ასევე ორგანიზაციები - „ყოფილი პოლიტპატიმრები - ადამიანის უფლებებისათვის“, „საზოგადოებრივი დამცველი“, საქართველოს ახალგაზრდა იურისტთა ასოციაცია,
„სოლიდარობა უკანონო პატიმრებს“, კავკასიის ქალთა ქსელი.

მრგვალი მაგიდის მონაწილეებს ადვოკატთა ინსტიტუციური დევნის თაობაზე ვრცლად ესაუბრა საქართველოს ადვოკატთა ასოციაციის პრეზიდენტი, ზაზა ხატიაშვილი. პარლამენტის ადამიანის უფლებათა კომიტეტის თავმჯდომარის მოადგილე, დიმიტრი ლორთქიფანიძემ არასამთავრობო სექტორს პრობლემების განსახილველად პარლამენტის ტრიბუნა შესთავაზა. სახალხო დამცველის აპარატის წარმომადგენელმა ირაკლი მჟავანაძემ კი განაცხადა, რომ სახალხო დამცველი მზად არის, რეაგირება მოახდინოს ადვოკატთა დევნის ფაქტებზე.
 
დისკუსიაში ასევე მონაწილეობდნენ ადვოკატები: ქეთი ბექაური, ნათია კორკოტაძე, ქეთი ვარდანაშვილი, ჯუმბერ მილორავა, ირინა საღინაძე. დისკუსიის მონაწილეები სამომავლო თანამშრომლობის გზებზე შეთანხმდნენ.   

11.05.12.