პორტალი ადამიანის უფლებების შესახებ

საქართველოს ჟურნალისტური ეთიკის ქარტიამ შინაგან საქმეთა სამინისტროს მოუწოდა, დაუყოვნებლივ გამოიძიოს გელა მთივლიშვილის მიმართ თიანეთის პოლიციაში მომხდარი ფაქტი.

გელა მთივლიშვილი ამჟამად თიანეთის საავადმყოფოში იმყოფება, ძალიან სუსტადაა და მკურნალობს. მისი თქმით, ის 20 მაისს, დილის საათებში თიანეთის პოლიციას უღებდა ფოტოებს, რა დროსაც პოლიციამ დააკავა,  აპარატურა წაართვეს, გადაღებული მასალა კი წაუშალეს და ცემეს.

შინაგან საქმეთა სამინისტროს ანალიტიკური დეპარტამენტის უფროსმა კი განაცხადა, რომ გელა არ დაუკავებიათ და არ უცემიათ. პოლიციამ უბრალოდ მისი ვინაობის დადგენა სცადა, რადგან გელამ პროვოკაცია მოაწყო.

„აშკარად პროვოკაცია მოაწყო: ვინაობა არ გაუმხილა პოლიციელებს და როდესაც ვინაობის დასადგენად შენობაში შეიყვანეს, მერე აღარ გამოდიოდა იქიდან, სანამ ძალით არ გამოაგდეს. პოლიციელებს არც უცემიათ, არც ხელი დაუკარებიათ მისთვის, არც აპარატურა წაურთმევიათ და არც იქ ჩაწერილი მასალა წაუშლიათ“, - განაცხადა უტიაშვილმა Media.Ge-სთან საუბრისას.

ჟურნალისტური ეთიკის ქარტიის განცხადებაში აღნიშნულია, რომ  შოთა უტიაშვილის, მიერ გაკეთებული კომენტარი სამინისტროს უპასუხისმგებლო დამოკიდებულებას გამოხატავს.

„უკანასკნელ პერიოდში ჟურნალისტების მიმართ მომხდარი ძალადობის ფაქტებზე სამინისტროს უმოქმედობა არის წამახალისებელი ფაქტორი ჟურნალისტების მიმართ ძალადობის განსახორციელებლად, დღეს მომხდარი ფაქტიც ამ უმოქმედობის შედეგია, სწორედ ამიტომ შინაგან საქმეთა სამინისტრომ სრულად უნდა აიღოს პასუხისმგებლობა მომხდართან დაკავშირებით“, - აღნიშნულია ქარტიის განცხადებაში.