პორტალი ადამიანის უფლებების შესახებ

ჩვენ, ქვემორე ხელმომწერი ორგანიზაციები გამოვთქვამთ შეშფოთებას უკანასკნელ ხანებში ფონდ „ქომაგთან“ დაკავშირებული მოვლენების გამო.

როგორც ჩვენთვის გახდა ცნობილი, მიმდინარე წლის 9 ივნისს შსს კონსტიტუციურ უსაფრთხოების დეპარტამენტმა დაიწყო მასობრივად იმ ხალხის დაბარება, რომლებმაც ფონდ „ქომაგს“ დახმარების თხოვნით მიმართეს.

არაერთი მოქალაქე ე. წ. მოდულის შენობაში გადაიყვანეს უწყებების ჩაბარებისთანავე მუქარით და იძულებით. უწყებაში არ ყოფილა მითითებული მოტივი, თუ რასთან დაკავშირებით უნდა დაეკითხათ ისინი. მოქალაქეებს არ მიეცათ ადვოკატის აყვანის შესაძლებლობა. დაკითხვა მიმდინარეობდა ხანგრძლივი დროის მანძილზე, ზოგ შემთხვევაში - 10 საათის განმავლობაში.

გივი ქურიძეს ინფექციურ საავადმყოფოში გაუკეთდა ოპერაცია, რის შემდეგაც ძალზედ მძიმე მდგომარეობაში მყოფი პაციენტი სამართალდამცავი ორგანოების წარმომადგენლებმა, ექიმის სასტიკი წინააღმდეგობის მიუხედავად, ძალით წაიყვანეს დასაკითხად „მოდულის“ შენობაში. ხანგრძლივი დროის განმავლობაში ავადმყოფი ადამიანი ჰყავდათ დაკითხვაზე, ადვოკატის გარეშე. გივი ქურიძე აცხადებდა, რომ ცუდად გრძნობდა თავს, სტკიოდა ნაოპერაციები ჭრილობები, საიდანაც აშკარად სდიოდა სისხლი. მიუხედავად ამისა, მის დაკითხვას ჯიუტად განაგრძობდნენ სამართალდამცავები. დაკითხვის პროცესში ქურიძე შეუძლოდ გახდა, რის გამოც გამოიძახეს სასწრაფო, რომელმაც გივი ქურიძე უკან დააბრუნა  ინფექციურ საავადმყოფოში.  იგი დღეის მდგომარეობითაც იმყოფება საავადმყოფოში და  მკურნალობს.

მანანა გურგენაშვილი ღამის 10 საათზე ყოველგვარი წინასწარი გაფრთხილების გარეშე გადაიყვანეს მოდულის შენობაში. მასთან სახლში მივიდნენ უცხო პირები და უთხრეს, რომ იგი სასწრაფოდ, დაუყოვნებლივ უნდა გაყოლოდა მათ. ქალბატონ მანანას აჩვენეს უწყება, რომელშიც იგი მოწმის სტატუსით იყო მოხსენიებული. აღსანიშნავია ისიც, რომ აღნიშნული უწყება მისთვის არ ჩაუბარებიათ კანონით დადგენილი მოთხოვნების შესაბამისად. გარდა ამისა,  მას და მის ოჯახის წევრებს არ განმარტებიათ  თუ რატომ, რომელ საქმეზე და რასთან დაკავშირებით უნდა მომხდარიყო მისი სასწრაფო, გადაუდებელი გადაყვანა მოდულის შენობაში და  დაკითხვა.

მსგავსი უკანონო ქმედებების მსხვერლნი გახდნენ ასევე სხვა მოქალაქეები: მარეხი ვაჟბედაშვილი; ლეილა ჭეიშვილი;  მანანა ჯაჯანაშვილი; ნუგზარ ბელქანია;  ლამზირა ყორჩიშვილი.

მიგვაჩნია, რომ ზემოთაღნიშნული ფაქტები წარმოადგნენ ადამიანის ფუნდამენტური უფლებების უხეშ დარღვევებს და  ეჭვსქვეშ აყენებენ საქართველოს ხელისუფლების მიერ დეკლარირებულ პრინციპებს.

ხელმომწერი არასამთთავრობო ორგანიზაციები მოვითხოვთ აღნიშნული უკანონო ქმედებების გამოძიებას და დამნაშავეთა დასჯას.

ჩვენ ასევე მივმართავთ როგორც საქართველოს სახალხო დამცველს, ასევე  საერთაშორისო ორგანიზაციებს და საქართველოში აკრედიტირებულ დიპლომატიურ კორპუსს რეაგირებისთვის.