პორტალი ადამიანის უფლებების შესახებ

„ერთიანი ნაციონალური მოძრაობის“ კოორდინატორები დუშეთში მოსახლეობის „სოციალური საჭიროებების“ გარკვევის მიზნით გამოკითხვას ატარებენ.

„კოორდინატორი ჩემს ოჯახშიც მოვიდა. სპეციალური კითხვარი ჰქონდა, რომელიც თვითონვე შეავსო. არკვევდა, რა სახის პრობლემის მოგვარება გვინდოდა - სახლში წყლის შეყვანა, გაზის შეყვანა, ვინმესთვის ოპერაციის გაკეთება თუ სახლის წინ გზის მოასფალტება. იგივე კოორდინატორი ჩემს მეზობლებთანაც მივიდა. ვისაც სოციალური დახმარება მოხსნილი ჰქონდა, ყველას უთხრეს, რომ ამ კითხვარის შევსების შემდეგ სოციალური დახმარება ისევ დაენიშნებათ,“ - უთხრა მცხეთა-მთიანეთის საინფორმაციო ცენტრს დუშეთში მცხოვრებმა ერთ-ერთმა მოქალაქემ, რომელმაც საკუთარი ვინაობის გამხელა არ ისურვა.
 
დუშეთის გამგებლის მოადგილე ნინო ხუციშვილი, რომელიც ამავე დროს „ერთიანი ნაციონალური მოძრაობის“ დუშეთის ახალგაზრდული ორგანიზაციის თავმჯდომარეა, აცხადებს, რომ ასეთი გამოკითხვის შესახებ მას ინფორმაცია არ აქვს. „დუშეთში ასეთი გამოკითხვა რომ ტარდებოდეს, აუცილებლად მეცოდინებოდა. ბოლო დროს ძალიან ბევრი ჭორი ვრცელდება. ესეც ალბათ, მორიგი ჭორია,“ - აღნიშნა ხუციშვილმა.
 
მცხეთა-მთიანეთის საინფორმაციო ცენტრისთვის მოწოდებული ინფორმაციის თანახმად, მმართველი პარტიის კოორდინატორები გამოკითხვებს ძირითადად სოციალურად გაჭირვებულ ოჯახებში ატარებენ.