კოალიცია „ქართული ოცნების“ მხარდამჭერი, 20 წლის აკაკი ცქიმანაური, რომელიც პირველ ივლისს მცხეთაში „ქართული ოცნების“ მიერ გამართულ აქციაში მონაწილეობდა, სამსახურიდან გაათავისუფლეს.
აკაკი ცქიმანაური დუშეთში, რესტორან „შატილში“ 5 თვის განმავლობაში დამხმარედ მუშაობდა. რესტორნის ადმინისტრაციასთან მას კონტრაქტი გაფორმებული არ ჰქონია და ხელფასს 150–200 ლარს ხელზე უხდიდნენ. აკაკი ცქიმანაური სოციალურად დაუცველი ოჯახის წარმომადგენელია. მისი მამა დუშეთის დასუფთავების სამსახურში მუშად მუშაობს. მცხეთა-მთიანეთის საინფორმაციო ცენტრის ინფორმაციით, სამსახურიდან გათავისუფლებით მასაც ემუქრებიან, თუ მისი შვილი „ქართულ ოცნებას“ არ ჩამოსცილდება.
აკაკი ცქიმანაურმა მცხეთა-მთიანეთის საინფორმაციო ცენტრთან კომენტარის გაკეთებაზე უარი სწორედ იმ მიზეზით თქვა, რომ მამამისი სამსახურიდან არ გაუშვან.
რესტორანი „შატილი“ ტელეკომპანია „იმედის“ 30 პროცენტიანი წილის მფლობელს, გიორგი კორახაშვილს ეკუთვნის. რესტორანს „ერთიანი ნაციონალური მოძრაობის“ დუშეთის რაიონული ორგანიზაციის თავმჯდომარე ზურაბ წყარუაშვილი ხელმძღვანელობს.
მცხეთა-მთიანეთის საინფორმაციო ცენტრი