„ქართული ოცნების“ წევრს თაღლითობის ბრალდებით დაუსწრებლად ასამართლებენ

თბილისის საქალაქო სასამართლოში „ქართული ოცნების“ წევრის, მელიქ რაისიანის პროცესი მიმდინარეობს. მელიქ რაისინის წინააღმდეგ საქმე თაღლითობის მუხლით არის აღძრული.

პროცესს ესწრებოდა „ქართული ოცნების“ ერთ-ერთი ლიდერი სოზარ სუბარი. მისი თქმით, საქმე ეხება 2006 წელს, ახალქალაქში მომხდარ ფაქტს. სუბარის განმარტებით, საქმეში დაზარალებულად ცნობილი მალვინა მატარიძის განცხადებით, რაისიანმა მის 38 000 ლარი გამოსძალა, სანაცვლოდ კი მისი ფირმის მფარველობას დაჰპირდა.

სუბარი მიიჩნევს, რომ რაისიანი პოლიტიკური დევნის მსხვერპლია. მისი განცხადებით, მალვინა მატარიძემ რაისიანის წინააღმდეგ სარჩელი 2012 წლის 25 მაისს, მხოლოდ მას შემდეგ შეიტანა, რაც რაისიანმა „ქართულ ოცნებას“ მხარდაჭერა ღიად გამოუცხადა.

სოზარ სუბარი ვარაუდობს, რომ რაისიანს, რომელიც ამჟამად ძებნაშია, სასამართლო დაუსწრებლად მიუსჯის თავისუფლების აღმკვეთ ღონისძიებას, რადგან მან ვერ შეძლოს საპარლამენტო არჩევნებში მონაწილეობა. „ქართული ოცნების“ ერთ-ერთმა ლიდერმა ისიც განაცხადა, რომ პროცესი სექტემბერში იყო ჩანიშნული, თუმცა საქმე დაჩქარებული წესით აგვისტოში განიხილება.

ინტერპრესნიუსი