პორტალი ადამიანის უფლებების შესახებ

კოალიცია „ქართული ოცნების“ სამტრედიის მაჟორიტარი დეპუტატობის კანდიდატი, კახი კალაძე ტყიბულში, სოფელ ორპირში კოალიციის მაჟორიტარი დეპუტატობის კანდიდატთან, ელისო ჩაფიძესთან ერთად ადგილობრივ მოსახლეობას შეხვდა. ორპირელებთან შეხვედრის შემდეგ, კახი კალაძემ სოფლის ახალგაზრდებთან ფეხბურთი ითამაშა და ბურთზე საკუთარი ხელმოწერაც დატოვა.

„წინასაარჩევნოდ ნაციონალური მოძრაობის წარმომადგენლები ყველასთან მოვლენ და ბევრ რამეს დაგპირდებიან. მათ შორის, შეიძლება, ფულიც დაგირიგონ. თქვენ მომთხოვნები უნდა იყოთ ამ ხელისუფლების მიმართ და 1 ოქტომბრის მერე, ახალი ხელისუფლების მიმართაც. მე დღეს ქალბატონ ელისო ჩაფიძის მხარდასაჭერად ჩამოვედი და იმედი მაქვს, ის ამ რაიონში „ქართულ ოცნებასთან“ ერთად გაიმარჯვებს“, - განაცხადა კალაძემ მოსახლეობასთან შეხვედრაზე. 

„ქართული ოცნების“ ტყიბულის მაჟორიტარი კანდიდატი ელისო ჩაფიძე humanrights.ge-სთან საუბრისას ამბობს: „მიხარია, ჩემი ღია შეხვედრები ამომრჩევლებთან კახი კალაძესთან ერთად რომ დაიწყო. თუმცა არ გამოვრიცხავ, რომ სხვა კანდიდატებიც ჩამოვიდნენ და მიიღონ მონაწილეობა ჩემს საარჩევნო კამპანიაში. ზუსტ თარიღს ვერ გეტყვით, მაგრამ არ გამოვრიცხავ რომ უახლოეს დღეებში ტყიბულს შესაძლოა, ბატონი ბიძინაც ესტუმროს“.

შეხვედრის დასრულების შემდეგ კალაძემ ამომრჩევლებთან სამახსოვრო ფოტოები გადაიღო.

მარი ტაბიძე, ტყიბული