„საქართველოს გზამ“ ხარაგაულის გამგებლის თანამდებობაზე თავისი კანდიდატი დაასახელა

ხარაგაულის მუნიციპალიტეტის გამგებლის თანამდებობაზე კონკურსია გამოცხდებული.  ვაკანტურ თანამდებობაზე ორი განაცხადია შესული. ერთ-ერთი  პარტია „საქართველოს გზის“ წარმომადგენლის, გიგა გლუნჩაძის განცხადებაცაა. გლუნჩაძე  გასული წლის საპარლამენტო არჩევნებში „საქართველოს გზის“ მაჟორიტარი კანდიდატი იყო, თუმცა მან თავისი კანდიდატურა „ქართული ოცნების“ სასარგებლოდ მოხსნა.

 გლუნჩაძის კანდიდატურა „საქართველოს გზის“ ლიდერებმა, თავჯდომარე თემურ მურვანიძემ და თბილისის საკრებულოს წევრმა, ფრაქცია „ქართული ოცნება თბილისელებისათვის“  წარმომადგენელმა ნათელა მაჭავარიანმა წარადგინეს. ისინი ხარაგაულის საკრებულოს თავმჯდომარეს აკაკი მაჭავარიანს შეხვდნენ. 

ხარაგაულის გამგებელი სპეციალური კომისიის მიერ კონკურსის წესით უნდა შეირჩეს.  შერჩეული კანდიდატი  25 იანვარს დასამტკიცებლად  საკრებულოს წარედგინება.  რა კრიტერიუმებით შეირჩევა გამგებელი, ამ ეტაპზე უცნობია. 

მარი ტაბიძე, ხარაგაული