სალომე აჩბა
საქალაქო სასამართლოს მოსამართლემ, ვაჟა ფუხაშვილმა პატიმრების წამებისა და არაადამიანური მოპყრობის საქმეზე მიმდინარე სასამართლო პროცესის დახურვის გადაწყვეტილება მიიღო, რაც იმას ნიშნავს, რომ პროცესზე დასწრებას მხოლოდ პროცესის მონაწილე მხარეები შეძლებენ.
მოსამართლემ გადაწყვეტილება იმით დაასაბუთა, რომ პროცესის საჯაროობამ, საქმის არსიდან გამომდინარე, შესაძლოა შელახოს დაზარალებულთა პირადი ცხოვრების ხელშეუხებლობის უფლება და საფრთხე შეუქმნას ბრალდებულებსაც.
„ჩვენ ვითვალისწინებთ საზოგადოების მაღალ ინტერესს ამ კონკრეტულ საქმესთან დაკავშირებით. თუმცა, ვინაიდან ბრალდებულებს ბრალად ედებათ დანაშაული, რომელიც დაკავშირებულია სქესობრივი ძალადობის ხასიათის ფაქტებთან, ვიღებთ გადაწყვეტილებას, რომ პროცესი დაიხუროს. პროცესის საჯაროობით, ერთის მხივ, შესაძლოა საფრთხე შეექმნას დაზარალებულთა პირადი ცხოვრების ხელშეუხებლობის უფლებას, მეორე მხრივ, კი, შესაძლოა თავად ბრალდებულების უსაფრთხოებაც შეილახოს“. - აღნიშნა მოსამართლე ფუხაშვილმა.
პატიმრების წამების ამსახველი ვიდეოკადრების გავრცელების შემდეგ, სასჯელაღსრულების დეპარტამენტის თანამშრომლებს, მათ შორის დავით ჭაკუას, გაგა მკურნალაძეს, ლევან ფურცხვანიძეს, ციხის სკანდალური კადრების გამავრცელებელ ვლადიმერ ბედუკაძესა და კიდევ 14 პირს, ბრალი წამებასა და არაადამიანურ მოპყრობაში დაედოთ.
მოსამართლის განმარტებით, კანონის შესაბამისად, საჯარო გახდება ის სხდომა, რომელზეც აღნიშნულ საქმეზე განაჩენი გამოცხადდება.
ახალი ამბები
პოპულარული
რატომ ვერ იბრუნებენ კონფლიქტით დაზარალებული ოსები საქართველოს მოქალაქეობას და ქონებას?
სპეციალურ პენიტენციურ სამსახურს წამების მსხვერპლის სასარგებლოდ 50 000 ლარის გადახდა დაეკისრა
'ალბათ, ნებისმიერი რეგიონული ჟურნალისტი გეტყვით, რომ გადარჩენისთვის გვიწევს ბრძოლა!'
