თბილისის ”ადამიანის უფლებათა სახლი ” ოფიციალურად გაიხსნა

თამთა  თვალავაძე

   

3 ივნისს,  თბილისის  ”ადამიანის  უფლებათა  სახლი” ოფიციალურად     გაიხსნა. ადამიანის უფლებათა სახლი, ექვს ადგილობრივ ორგანიზაციას:”კონსტიტუციის  42-ე  მუხლს”, ”ადამიანის  უფლებათა ცენტრს”,   ”მედია ინსტიტუტს”,”ადამიანის უფლებებისა და კონფლიქტების კვლევის ცენტრ- კავკასიას”, „კავშირ საფარს“ და „წამების მსხვერპლთა ფსიქო-სოციალური და სამედიცინო რეაბილიტაციის ცენტრს“ აერთიანებს. 

ადამიანის  უფლებათა   სახლის  გამგეობის  თავმჯდომარის  ალეკო ცქიტიშვილის  განცხადებით, ადამიანის უფლებათა სახლი და მასში შემავალი ორგანიზაციები,  ადამიანის  უფლებების  დაცვის  კუთხით იმუშავებს და ბენეფიციარებს  უსასყიდლოდ  მოემსახურება.

გახსნის  ოფიციალურ  ცერემონიას  ესწრებოდა თბილისის ადამიანის უფლებათა  სახლის  გამგეობის  ყოფილი თავმჯდომარე, საქართველოს სახალხო დამცველი უჩა  ნანუაშვილიც:

„მერწმუნეთ, ჩემი ოცნება არასოდეს ყოფილა გავმხდარიყავი სახალხო დამცველი, მაგრამ ჩემი ოცნება ნამდვილად იყო, რომ თბილისის ადამიანის უფლებათა სახლი გახსნილიყო. საქართველოში არსებობს  ბევრი სერიოზული  პრობლემა  ადამიანის   უფლებათა   თვალსაზრისით  და   იმედი  მაქვს,  ადამიანის უფლებათა სახლის   საქმიანობა  იქნება   წინგადადგმული  ნაბიჯი ამ მიმართულებით”, - აღნიშნა უჩა ნანუაშვილმა. 

გახსნის ოფიციალურ ცერემონიალს ესწრებოდნენ ადამიანის  უფლებათა სახლის ფონდის  აღმასრულებელი  დირექტორი - მარია  დალე,  ნორვეგიის სამეფოს  საგანგებო და  სრულუფლებიანი  ელჩი  საქართველოში -ერლინგ შკონსბერგი, ნიდერლანდების  სამეფოს  ელჩი  საქართველოში- პიტერ იან ლანგენბერგი  და  სხვა  არასამთავრობო    სექტორის   წარმომადგენლები.  

გახსნის ოფიციალური ცერემონიალის ბოლოს, წევრმა ორგანიზაციებმა ურთიერთთანამშრომლობის მემორანდუმსაც მოაწერეს ხელი.