ეთიკის ქარტია მოუწოდებს მედიას ანონიმურობა შეუნარჩუნოს ოჯახური ტრაგედიის მონაწილეებს

საქართველოს ჟურნალისტური ეთიკის ქარტია  მოუწოდებს მედიასაშუალებებს შეასწორონ ინფორმაცია 10 ივნისს მომხდარი  მკვლელობის  შესახებ იმგვარად, რომ  შეუძლებელი გახდეს ტრაგედიის მონაწილე პირების იდენტიფიცირება და ინტერნეტში მოძიება. ამავე დროს, ქარტია მოუწოდებს შს სამინისტროს ანონიმურობა შეუნარჩუნოს არა მხოლოდ ბრალდებულს, არამედ მსხვერპლსაც.

10 ივნისს შს სამინისტრომ გაავრცელა ინფორმაცია, რომ თბილისთან ახლოს, სოფელ დიღომში, მამაკაცმა მეუღლე და მცირეწლოვანი შვილი მოკლა. სამინისტროს ვებ-გვერდზე გამოქვეყნებულ ცნობაში დაკავებული ბრალდებული მოხსენიებულია ინიციალებითა, თუმცა დასახელებულია მსხვერპლის ვინაობა.

ქარტია თავის მიმართვაში  შენიშნავს, რომ  საინფორმაციო სააგენტოების ნაწილის მიერ გავრცელებულ ინფორმაციაში მითითებულია, როგორც ბრალდებულის ისე მსხვერპლის ვინაობა და საცხოვრებელი ადგილი, რაც ოჯახის სხვა წევრების (მათ შორის ბავშვების) იდენტიფიცირების საშუალებას იძლევა. 

ქარტია სთხოვს მედიის წარმომადგენლებს, ფრთხილად მოეკიდონ მსგავს ინფორმაციას, ნუ ეცდებიან მსხვერპლისა და ბრალდებულის იდენტიფიცირებას, „რადგან მათი საცხოვრებელი ადგილისა და ვინაობის დასახელება ამ ახალ ამბავს დამატებით ინფორმაციას ნამდვილად არ სძენს.“

„მედია უნდა ეცადოს, რომ ასეთი მძიმე შემთხვევების შესახებ ინფორმაციის გავრცელებისას თუნდაც უნებლიედ რისკის ქვეშ არ დააყენოს ბავშვები“ აღნიშნავს ჟურნალისტური ორგანიზაცია, რომელიც მადლობას უხდის იმ მედიასაშუალებებს, „რომლებმაც გაითვალისწინეს ადამიანებისთვის ზიანის მიყენების საფრთხე და ინფორმაცია როგორც მსხვერპლის, ისე ბრალდებულის იდენტიფიცირების გარეშე გაავრცელეს.“

www.media.ge