შორენა კაკაბაძე, ქუთაისი
2013 წლის საპრეზიდენტო არჩევნებისთვის ქუთაისში 127 საარჩევნო უბანია გახსნილი. ამას ემატება ორი - 128-ე და 129-ე სპეციალური უბანი, რომელიც არჩევნების დღეს ქუთაისის მე-2 საპყრობილესა და საჯარისო ნაწილში, მე-3 ქვეით ბრიგადაში იმუშავებს.
„ეს სპეცუბნები ჩვეულებისამებრ, როგორც დანარჩენი 127, 27 ოქტომბერს, დილის 7 საათზე გაიხსნება და ხმის მიცემის პროცედურა 8 საათზე დაიწყება. არაფერი განსაკუთრებული აღნიშნულ უბნებზე არ ხდება, გარდა იმისა, რომ ერთ უბანზე ხმას აძლევენ პატიმრები, ხოლო მეორეზე სამხედრო პირები“, - განუცხადა humanrights.ge-ს ქუთაისის 59-ე საოლქო საარჩევნო კომისიის თავმჯდომერემ ავთანდილ ოსეფაიშვილმა.
ქუთაისის საოლქო კომისიას უკვე გადაეცა ამომრჩევლის სიები. 128-ე სპეციალურ საარჩევნო უბანზე ხმას 419, ხოლო 129-ე უბანზე 460 ამომრჩეველი მისცემს ხმას.
ქუთაისის მე-2 საპყრობილეში პატიმრების გარდა, ხმის მიცემის საშუალება ადმინისტრაციის თანამშრომლებსაც ექნებათ. მათთვის 129-ე სპეცუბანზე ერთიან სიასთან ერთად სპეციალური სია გადაიგზავნება.