გურჯაანის მაჟორიტარი დეპუტატობის კანდიდატად პარტია „ქართული ოცნება“ „ასკანელი ძმების“ ერთ-ერთ დამფუძნებელს, „კახური ტრადიციული მეღვინეობა“-ს ხელმძღვანელს, ზურაბ ჩხაიძეს დაასახელებს - ამის შესახებ ინფორმაციას „ქართული ოცნების“ წევრი, ციცინო ღვინიაშვილი ავრცელებს.
ღვინიაშვილის თქმით, ზურაბ ჩხაიძის კანდიდატურას პარტია „ქართული ოცნება“ 8 ივნისამდე წარადგენს.
ზურაბ ჩხაიძე 1998 წელს დაფუძნებული შპს “ასკანელი ძმები"-ს 25%-იანი წილის მფლობელია. ამ კომპანიის წილები ასევე ეკუთვნით მის ძმებს - ჯიმშერ (25%) და გოჩა ჩხაიძეებს (50%).
ზურაბ ჩხაიძე აგრეთვე არის ფესტივალ „ქართული სულისა” და ფონდ „თამარ მეფის“ დამფუძნებელი. იგი 2011 წლიდან „ქართული ხმების“ წევრი, კომპანია „კახური ტრადიციული მეღვინეობის“ დამფუძნებელი და გენერალური დირექტორია.