ადამიანის უფლებათა ცენტრისა და საქართველოს სახალხო დამცველის პრევენციის ეროვნული მექანიზმის წარმომადგენლებმა სასჯელაღსრულებისა და პრობაციის სამინისტროს №11 არასრულწლოვანთა სარეაბილიტაციო დაწესებულების და №8 პატიმრობისა და დახურული ტიპის თავისუფლების აღკვეთის დაწესებულების არასრულწლოვან ბრალდებულთა და მსჯავრდებულთა განყოფილების მონიტორინგი განახორციელეს.
მონიტორინგი განხორციელდა სახალხო დამცველისა და ადამიანის უფლებათა ცენტრის ურთიერთთანამშრომლობის მემორანდუმის ფარგლებში, რომელიც ითვალისწინებს ერთობლივ მონიტორინგს ქალი და არასრულწლოვანი პატიმრების მდგომარეობის შესასწავლად.
ადამიანის უფლებათა ცენტრის პროექტი - „ქალი და არასრულწლოვანი პატიმრების მდგომარეობის მონიტორინგი საქართველოში“ ბულგარეთის რესპუბლიკის საელჩოს მხარდაჭერით მიმდინარეობს.
პროექტის მიზანს ქალთა და არასრულწლოვანთა პენიტენციურ და სარეაბილიტაციო დაწესებულებებში არსებული პრობლემების გამოვლენა და მდგომარეობის გაუმჯობესების ხელშეწყობა წარმოადგენს.
მონიტორინგის შედეგები და მიგნებები აისახება საბოლოო ანგარიშში, რომელსაც ერთობლივად მოამზადებს ადამიანის უფლებათა ცენტრი და სახალხო დამცველის პრევენციისა და მონიტორინგის დეპარტამენტი.
ადამიანის უფლებათა ცენტრი