თამარ გამრეკელაშვილის მკვლელობის საქმეზე სასამართლო პროცესი დაიხურა

პროკურორმა გიორგი შაიშმელაშვილმა შუამდგომლობა იმით დაასაბუთა, რომ, ვინაიდან საქმე ოჯახურ დანაშაულს ეხება, სასამართლო სხდომებზე პირადი ინფორმაცია გაჟღერდება და არასრულწლოვნებიც დაიკითხებიან. პროკურორის შუამდგომლობას დაცვის მხარე და ბრალდებულები - ვეფხია და თემურ ბაქრაძეებიც დაეთანხმნენ.

დღევანდელ სხდომაზე თამარ გამრეკელაშვილის დედა, ნათელა გობაძე დაიკითხება.

„გამოძიებისთვის ყველანაირი ინფორმაცია უკვე მიწოდებული მაქვს. დამნაშავე უნდა დაისაჯოს. ბავშვები იქ იყვნენ და დანაშაულს უყურეს. იქ ბენზინიც იყო და ვეფხია ბაქრაძე ბავშვების დაწვას აპირებდა, მაგრამ ვერ მოასწრო. არამარტო მკვლელი და მოძალადე, ყველაზე აღვირახსნილი ადამიანია. ჩემზე რომ ძალადობდა, ამიტომ არ მინდოდა მასთან ცხოვრება“, - განაცხადა ნათელა გობაძემ.

თამარ გამრეკელაშვილი 13 აპრილს, თბილისში, ბარნოვის ქუჩაზე მდებარე საცხოვრებელ სახლში მოკლეს. მომხდართან დაკავშირებით შინაგან საქმეთა სამინისტრომ 14 აპრილს, მოკლულის მამინაცვალი, ვეფხია ბაქრაძე თელეთში დააკავა. საქმის მასალების მიხედვით, ვეფხია ბაქრაძემ ქალს არასრულწლოვანი შვილების თანდასწრებით, გულმკერდისა და ყელის არეში, დანით მრავლობითი ნაკვეთ-ნაჩხვლეტი ჭრილობა მიაყენა.

შსს-ს ინფორმაციით, მკვლელობამდე რამდენიმე საათით ადრე, მოკლული და დედამისი პოლიციის განყოფილებაში გამოცხადდნენ და მამინაცვლის მიმართ შემაკავებელი ორდერის გამოწერა ითხოვეს. პოლიციამ ორდერი გამოწერა. შსს-ს ცნობით, თამარ გამრეკელაშვილმა პირადი საქმეების გამო, პოლიციის შენობა მარტომ, დედაზე ადრე დატოვა, მალევე კი პოლიციაში შეტყობინება შევიდა თამარ გამრეკელაშვილის მკვლელობის შესახებ.

თამარ გამრეკელაშვილის მკვლელობასთან დაკავშირებით გამოძიება 11 პრიმა 109–ე მუხლით მიმდინარეობს, რაც გულისხმობს ოჯახში ძალადობის ნიადაგზე ჩადენილ განზრახ მკვლელობას დამამძიმებელ გარემოებაში. აღნიშნული მუხლი 16–დან 20 წლამდე ან უვადო პატიმრობას ითვალისწინებს.

მკვლელობის საქმეზე კიდევ ერთი პირი, თემურ ბაქრაძე დანაშაულის შეუტყობინებლობის ბრალდებით 15 აპრილს დააკავეს.

წყარო