სასამართლომ ელენე ხოშტარია 2200 ლარით დააჯარიმა

 

2021 წლის 11 ივლისს თბილისში, ტელეკომპანია ტვ „პირველის“ ოპერატორის, ლექსო ლაშქარავას გარდაცვალების გამო გამართულ საპროტესტო აქციის დღეს, ელენე ხოშტარიამ მთავრობის ადმინისტრაციის კედელს  წითელი ფერის საღებავი შეასხა. მიუხედავად პოლიციელთა მოწოდებისა, ხოშტარია მათ არ დაემორჩილა  და წვრილმანი ხულიგნობისა და პოლიციელის შეურაცხყოფის გამო, მის მიმართ  ადმინისტრაციული სამართალდარღვევის ოქმი შედგა. 

15 სექტემბერს, თბილისის საქალაქო სასამართლოში ჩანიშნულ სასამართლო სხდომაზე ელენე ხოშტარია არ გამოცხადდა. ადმინისტრაციული სამართალდარღვევის საქმის განხლვაზე ხოშტარია არც ოქტომბრის თვეში გამოცხადდა. მან მოსამართლე კობა ჩაგუნავას სხდომის მდივანს და მედიასაშუალებების წარმომადგენლებს განუმარტა, რომ დღევანდელი სასამართლოსადმი ნდობა არ აქვს და არ აპირებს ამ საქმის განხილვაში მონაწილეობას. ამის მიუხედავად მოსამართლემ კვლავ გადადო სხდომა, სადგან საჭიროდ მიიჩნია კიდევ ერთხელ შეეტყობინებინა ელენე ხოშტარიასთვის მომდევნო სხდომის თარიღი, რათა მას ჰქონოდა შესაძლებლობა, დასწრებოდა ადმინისტრაციული სამართალდარღვევის ოქმის შემდგენი პოლიციელების ჩვენებას და თავადაც დაესვა კითხვები მისთვის.

5 ოქტომბერს გამართულ სხდომაზე მოწმის სახით ადმინისტრაციულ სამართალდარღვევის ოქმის შემდგენი პატრულ-ინსპექტორი, ვაჟა მელქაძე დაიკითხა. მოწმის თქმით, ხოშტარია ცდილობდა პოლიციელების კორდონის გარღვევას და შენობაში შეღწევას, აყენებდა სიტყვიერ შეურაცხყოფას პოლიციელებს და შენობაში მყოფ პირებს, რაც გამოიხატა შემდეგ სიტყვებში: „მონებო“, „ნაძირლებო“, „მკვლელებო“. 

მტკიცებულებათა გამოკვლევის დასრულების შემდგომ, მხარემ საპაექრო სიტყვა წარადგინა. თამარ ჯოხაძემ ხაზი გაუსვა, რომ მტკიცებულებათა ერთობლიობა არ ბადებს ეჭვს, ელენე ხოშტარიას მიერ ადმინისტრაციული სამართალდარღვევის ჩადენის არსებობაზე. ვიდეომასალაც ასახავს პოლიციელებთან ჭიდილსა და საღებავის გადასხმას, ასევე - ხოშტარიას მცდელობას, გაარღვიოს კორდონი. ადმინისტრაციული ორგანოს წარმომადგენლის თქმით, კუმულაციურად, აღნიშნული მტკიცებულებები ერთმანეთთან თანხვედრაშია, რის გამოც მან მოითხოვა ხოშტარიას სამართალდამრღვევად ცნობა.
 

სასამართლოს გადაწყვეტილებით, ელენე ხოშტარია სამართალდარღვევისათვის 2200 ლარით დაჯარიმდა.