19:33, Wednesday, 20.08.2014
YouTube
Twitter
Facebook
RSS
ქართული English

პორტალი ადამიანის უფლებების შესახებ

Go
გაფართოებული ძიება

მაღალმთიანი სოფლის მოსახლეობა შველას ითხოვს

08.01.2007
fxovlelebi.gifიქ არც საბავშვო ბაღია, არც სკოლა, არც მაღაზია და აფთიაქი. ვერც ქვით ნაშენ სახლებს ნახავთ. მათ არც გზა აქვთ, რომ რაიონულ ცენტრს დაუკავშირდნენ. იქ ვერც სასწრაფო დახმარების მანქანა მიდის და აუტანელი პირობების გამო სოფელში შემორჩენილ, მატარებლის ვაგონებსა და ქოხებში მცხოვრებ სულ სამ ოჯახს პირველად სამედიცინო დახმარებას 70 წელს მიტანებული ქალბატონი უწევს.

არაშენდის თემში შემავალი სოფელი ფხოველი გურჯაანის რაიონში, ქალაქიდან 12-13 კილომეტრში, მთებში მდებარეობს. ერთი შეხედვით, ვერ იტყვი რომ იქ ხალხი ცხოვრობს, რადგან ხის ტოტებისგან დაწნული ქოხები მთლიანად ხეებსა და ბუჩქებშია ჩაკარგული. სოფელში დიდი ხნის წინ ფხოვიდან ჩამოსახლებული ფხოვლელები ცხოვრობენ.

„ელემენტარული საცხოვრებელი პირობებიც რომ არ გვაქვს, თქვენც კარგად ხედავთ. გურჯაანიდან მანქანით ხომ ვერ წამოხვალ. ზაფხულში ერთხელ რომ  მოვიდეს წვიმა, სამანქანო გზაზე იმხელა ორმოებია, რომ მთელი სეზონი წყლით არის სავსე. განსაკუთრებით ცუდ მდგომარეობაში ზამთარში ვართ. სოფელი მაღალმთიანია და დიდი თოვლი და ყინვა იცის. გურჯაანიდან აქამდე ტყე-ტყე რომ ამოხვიდე, 8-9 საათი გჭირდება, თან შეიარაღებული თუ არ იქნები, შეიძლება ნადირმა დაგფლითოს. სოფელში მგლები შემოგვესივნენ და საქონელს აღარ ვჩივით, გვეშინია, ჩვენც არ შეგვჭამონ. ერთი სიტყვით ვყრივართ ძაღლუმადურად“ - ამბობს ზურაბ სადუნაშვილი. მისივე თქმით, ფხოველი მაღალმთიანი სოფელია, თუმცა ამ კატეგორიის სოფლებისათვის დაწესებული შეღავათებით მათ არასოდეს უსარგებლიათ: „ჩვენ არჩევნების დროსაც კი არავის ვახსენდებით, რადგან სამი ოჯახი ალბათ ვერაფერს გადაწყვეტს. რამდენჯერმე განცხადებითაც მივმართეთ რაიონის გამგეობას, მაგრამ ჩვენი გაჭირვებით არავინ დაინტერესებულა“ - აღნიშნავს იგი.

მიუხედავად ასეთი არასასურველი პირობებისა, ფხოვლელები აცხადებენ, რომ მათ სოფლის დატოვებას აიძულებენ: „დიდი ხანია აღარავის ვახსოვართ. ადგილობრივი ხელისუფლების ხელშეწყობით, დახმარების ნაცვლად ზოგიერთები პრობლემებს გვიქმნიდნენ, ნაკვეთებს გვართმევდნენ და თვითონ ისაკუთრებდნენ. სოფლის დატოვებას დღესაც გვაიძულებენ“ - აღნიშნავს ვაჟა იაგანაშვილი.

როგორც ფხოვლელებმა გვითხრეს, მათი სოფლით რაიონის ხელმძღვანელობასთან და კახეთის გუბერნატორთან დაახლოებული ბიზნესმენი სერგი კაკალაშვილია დაინტერესებული, რომელიც მეზობელ სოფელში სხვადასხვა სახის სამუშაოებს უკვე ახორციელებს. „გვითხრეს, მთელი ეს ადგილები, მეზობელი სოფლის ზიარის მსგავსად კაკალაშვილს სურს რომ იყიდოს და თქვენ აქ ხელს შეუშლითო. სიტყვაში შემოგვაპარეს მის მიერ მოგზავნილმა ადამიანებმა, ხომ არ ისურვებდით, თქვენი ქოხმახებიდან წასვლასო. არსად წასვლას არ ვაპირებთ და ნებისმიერ ადამიანს, რომელიც ინვესტიციის ჩადების გზით ცდილობს ჩვენს დამონებას და აქაურობის წართმევას, ისევე გავუძალიანდებით, როგორც შემოსეულ გარეულ ცხოველებს ვიგერიებთ. არ გვინდა ხელისუფლებას დავუპირისპირდეთ, მაგრამ ავი ზრახვების ნაცვლად ურჩევნიათ მოგვხედონ და შესაძლებლობების ფარგლებში დაგვეხმარნონ“ - ამბობენ სოფლის მაცხოვრებლები და აღშფოთებას ვერ მალავენ.

კომპანია „ფორტე – კახეთის“ ერთ-ერთი მფლობელის ფხოველით დაინტერესებას, ადგილობრივი მოსახლეობა იმ სიმდიდრეს უკავშირებს, რომელიც სოფელშია. სიმდიდრის შესახებ ინფორმაცია 66 წლის დურმიშხან ცუკოშვილს ვთხოვეთ: „ფხოველში მარტო 19 ეკლესია და 3 ციხე-სიმაგრის ნანგრევებია. აქ მიწიდან ამოდის ბორჯომის მსგავსი, სუფთა, მინერალური წყალი. მლაშე წყალიც ამოდის. ნამდვილი ახტალა აქ გვაქვს, სამკურნალო ტალახია. მიწა გვაქვს, რომელიც საპონივით ქაფდება. ყველაფერს რომ თავი დავანებოთ, ნავთობია, რომელიც დღემდე გამოუყენებელია“.

ფხოვლელების პრეტენზიებსა და ბრალდებებს გურჯაანის მუნიციპალიტეტის გამგეობაში კატეგორიულად უარყოფენ. რაიონის მუნიციპალიტეტის გამგებლის მოადგილე ვალერი ვარდოსანიძე აცხადებს, რომ ამ თანამდებობაზე ახალი დანიშნულია და ყველა პრობლემას არ იცნობს. „მე თელავში ვმუშაობდი. შესაბამისად გურჯაანის პრობლემებს ზედმიწევნით არ ვიცნობ, თუმცა სოფლებში არსებული მდგომარეობით დაინტერესებულია პირადად კახეთის გუბერნატორი გია ნაცვლიშვილი. იგი თავად ეცნობა თითოეული სოფლის პრობლემებს და ვსწავლობთ რა რესურსები გააჩნიათ მათ“ - ამბობს ვარდოსანიძე.

გურჯაანის გამგებელთან დაკავშირება შეუძლებელი აღმოჩნდა. ჩვენი სატელეფონო ზარები მან უპასუხოდ დატოვა. სამუშაო ოთახში კი, როგორც მისაღებში გვითხრეს, „ფრიად მნიშვნელოვანი საქმეების მოგვარებით ყოფილა დაკავებული და კომენტარისთვის არ სცალია.“

ჩვენ ბიზნესმენ სერგი კაკალაშვილსაც დავუკავშირდით, რომელმაც მას შემდეგ რაც შეიტყო  თუ რა საკითხზე გვსურდა მისგან კომენტარი, საუბარი აღარ ისურვა.

ფხოვლელები შველას ითხოვენ, მშველელი კი ჯერ არ ჩანს.


გელა მთივლიშვილი კახეთიდან

Print Send to Friend Send to Facebook Tweet This
დატოვეთ თქვენი კომენტარი
თქვენი სახელი:
თქვენი კომენტარი:

ქართულად
დამცავი კოდი: Code
სხვა სიახლეები
გამოკითხვა
როგორ აფასებთ თბილისის ყოფილი მერის, გიგი უგულავას დაკავებას?
დააკავეს რეალური დანაშაულისათვის, საპროცესო ნორმების დაცვით დააკავეს რელური დანაშაულისათვის, მაგრამ საპროცესო ნორმების დარღვევით დააკავეს არარეალური ბრალდებით, პოლიტიკური მოტივებით მიჭირს პასუხის გაცემა

ბლოგი

მოჩვენებითი მშვიდობა ბალკანეთში
ხანგრძლივი და რთული მოსამზადებელი პერიოდის, წვალების შემდეგ 30 ივლისს სარაევოში ჩავფრინდით. ცუდი მეტეოპირობების გამო, დაფრენის დროს განცდილი დიდი შიშის მიუხედავად, თვითმფრინავის ილუმინატორიდან სარაევოს
ვრცლად...
მშიერი კომისიის წევრები და გაბრაზებული თავმჯდომარეები ბათუმში
ბეჭედი ნაკვეთურის გარეშე და ორსახელიანი ამომრჩეველი გურიაში
არქივი
    

რედაქტორის აზრი

რა დაემართა სამართლიანობის აღდგენის ოცნებას
„მართლმსაჯულების ხარვეზები“ - რბილად ასე ვუწოდებთ იმ სისტემურ პრობლემებს, რაც ქართულ მართლმსაჯულებას ექს-პრეზიდენტ მიხეილ სააკაშვილის მმართველობის წლებში ახასიათებდა. 
ვრცლად...
პატიმართა მასობრივი პროტესტის მიზეზები
შემოდგომის ბუზი
არქივი
თემები
კატეგორიები

Copyright © 2004 - 2014 HRIDC