19:45, Tuesday, 02.06.2020
YouTube
Twitter
Facebook
RSS
ქართული English

პორტალი ადამიანის უფლებების შესახებ

Go
გაფართოებული ძიება

კეთილდღეობა თუ წინასაარჩევნო ზღაპრები?

27.02.2008
შორენა კაკაბაძე, ქუთაისი

საქართველოს სტატისტიკის სახელმწიფო დეპარტამენტის მონაცემებით, ქვეყანაში საარსებო მინიმუმი 194,5 ლარია. მოსახლეობის დიდი ნაწილის შემოსავალი კი, ამ მაჩვენებელს გაცილებით ჩამორჩება. დაძაბული სოციალური მდგომარეობის ფონზე ცენტრალური მთავრობა საკუთარ ხალხს გახმაურებულ (და კარგად გაპიარებულ) პროექტს „საქართველო სიღარიბის გარეშე“ სთავაზობს.

გაზრდილი პენსია, დასაქმებული ადამიანები, აღორძინებული სოფლის მეურნეობა, სხვადასხვა ტიპის სოციალური დახმარებები - პროექტის ის მიმართულებებია, რომელზეც ჩვენი ქვეყნის ხელისუფლება გამუდმებით საუბრობს და შესაბამისად, დაპირებებსაც უხვად არიგებს. მისივე განმარტებით, ყოველივე სულ რაღაც 50 დღეში რეალობად უნდა იქცეს.

როგორც ირკვევა, აღნიშნული საკითხის მიმართ ადამიანები არაერთგვაროვნად არიან განწყობილი. საზოგადოების დიდი ნაწილი ფიქრობს, რომ ხელისუფლებამ „წინასაარჩევნო კამპანია გაახურა“ და ხალხზე ზრუნვა აქ არაფერ შუაშია.

„ადამიანის უფლებათა ცენტრის“ ქუთაისის ოფისმა ქვეყნის სოციალური მდგომარეობით შეწუხებული რიგითი ქუთაისელების მოსაზრებები ჩაიწერა. 

გულიკო ჯაფარიძე, პედაგოგი: „სასაცილოა, როცა ხელისუფლება ამგვარ ზღაპრებს გვიყვება. ქვეყანაში, სადაც უმუშევართა რიცხვი დღითიდღე იზრდება და ადამიანები გამუდმებით გაჭირვებას უჩივიან, მთავრობა უფრო სერიოზულად უნდა მოქმედებდეს. არავის ამ ზღაპრების არ სჯერა. ესაა წინასაარჩევნო კამპანია, რომელიც საზოგადოების მხრიდან აგრესიისა და არაკეთილგანწყობის მეტს ვერაფერს იმსახურებს.“

თენგიზ სამხარაძე, მტვირთავი: „წელში ვარ გაწყვეტილი, რომ შვილები არ მოვაშიო და ოჯახი ვარჩინო. წლების მანძილზე ქუთაისის ავტოქარხანაში წამყვან ინჟინრად ვმუშაობდი და იქედან ისე გამომაგდეს, არავის უკითხავს, თავი რით უნდა მერჩინა. ამ ქვეყანაში ადამიანს საკუთარი თავის გარდა არავის იმედი არ უნდა ჰქონდეს, მითუმეტეს - მთავრობის. რასაც დაგვპირდა, როდის შეგვისრულა, რომ ეს დაპირება დავიჯეროთ? რა ვქნა, მაგათი სისულელეების იმედად ვერ ვიქნები. ვისაც სჯერა, მათ დაეხმარონ.“

მაგული სირბილაძე, დიასახლისი: „რა სოციალურ დახმარებებს ახსენებენ, როცა ავადსახსენებელი ვაუჩერების ბუმი ჯერაც არ დასრულებულა. ხალხს ელექტროენერგიისა და გაზის ვაუჩერები დაურიგეს და „ქუთგაზიდან“ და ენერგოკომპანიიდან იმხელა გადასახადები მოვიდა, რომ  ჯობდა, საერთოდ არაფერი ყოფილიყო. იმის იმედად, რომ ხელისუფლება ეხმარებოდა, ჩემმა მეზობელმა ელექტროენერგია თამამად მოიხმარა და მერე აღმოჩნდა, რომ სააბონენტო ნომერში შეცდომა იყო და მისი თანხა სხვის ანგარიშზე ჩაირიცხა. მას კი თანხის ნაღდი ანგარიშსწორება მოთხოვეს. თავბედი იწყევლა საცოდავმა და ვერაფერს გახდა. აი, ასეთ სოციალურ დახმარებებს გვთავაზობს ჩვენი ხელისუფლება.“

ნანი ლაღაძე, გამყიდველი: „პროდუქტების ფასები დღითიდღე იზრდება. შემოდიან ადამიანები, აკვირდებიან ფასებს და უკმაყოფილებას ვერ ფარავენ. ბუნებრივია, ეს არაა სასიამოვნო. პენსიები კიდეც რომ გაიზარდოს, ფასებს მაინც ვერ დაეწევა. ესაა გამოსასწორებელი და მთავრობამ ამაზე უნდა იზრუნოს. სხვა შემთხვევაში, ეს იქნება მორიგი დაპირება და მეტი არაფერი.“

გიორგი მჭედლიძე, უმუშევარი: „წინასაარჩევნო კამპანია სააკაშვილმა საპრეზიდენტო არჩევნების დღიდან დაიწყო. იცოდა, რომ ხალხი ისევ დაჭირდებოდა და არჩევნებს ხალხის გარეშე ვერ მოიგებდა. თუმცა, მოიგო თუ არა არჩევნები, ეს სხვა საკითხია. არ ვიცი, მე მათი დაპირებების არ მჯერა. არც გაზრდილი პენსიები და აღორძინებული სოფლის მეურნეობაა დიდად დასაჯერებელი.“

მანანა სანიკიძე, ფარმაცევტი: „ფაქტია, რომ ქვეყანაში მძიმე სოციალური მდგომარეობაა. მედიკამენტები გაძვირდა. არც პროდუქტები ჩამორჩება. ადამიანები გამაყუჩებელ წამლებს ვერ იძენენ და იღუპებიან, რადგან მკურნალობას ვერ ახერხებენ. მართალია, სოციალური პროგრამები არსებობს, მაგრამ ბევრი ადამიანი ამ პროგრამებში მოხვედრას ვერ ახერხებს და ხშირად მას ეხმარებიან, ვინც არცთუ ისე მიუსაფარია.“

Print Send to Friend Send to Facebook Tweet This
დატოვეთ თქვენი კომენტარი
თქვენი სახელი:
თქვენი კომენტარი:

ქართულად
დამცავი კოდი: Code
სხვა სიახლეები
გამოკითხვა
მხარს უჭერთ თუ არა სავალდებულო დაგროვებით საპენსიო სისტემას?
დიახ არა თავს შევიკავებ პასუხის გაცემისგან

ბლოგი

სექსუალური უმცირესობები საქართველოს ციხეებში
ბლოგი შექმნილია ევროკავშირის მიერ დაფინანსებული პროექტის „სასჯელაღსრულებისა და პრობაციის რეფორმების ხელშეწყობა და მონიტორინგი სამოქალაქო საზოგადოების ჩართულობით“ ფარგლებში, რომელსაც ახორციელებს ორგანიზაცია „ციხის საერთაშორისო რეფორმა“
ვრცლად...
უჩინარი მტერი
აპოკალიფსი არ იქნება
არქივი
   

       

რედაქტორის აზრი

ხელისუფლებისგან მივიწყებული ვეტერანები
ყოველწლიურად მცირდება მეორე მსოფლიო ომის მონაწილეთა რაოდენობა. მათ შესახებ კი საზოგადოება მხოლოდ 9 მაისს იღებს ინფორმაციას, როდესაც ომის ვეტერანები, ტრადიციულად, გამარჯვების პარკში იკრიბებიან
ვრცლად...
უიმედოთა სოფელი
რა დაემართა სამართლიანობის აღდგენის ოცნებას
არქივი
თემები
კატეგორიები

Copyright © 2004 - 2020 HRIDC