06:26, Saturday, 07.12.2019
YouTube
Twitter
Facebook
RSS
ქართული English

პორტალი ადამიანის უფლებების შესახებ

Go
გაფართოებული ძიება

ქვემო ქართლი წინასაარჩევნოდ - დასერილი საარჩევნო ბანერები, სწრაფად ცვლადი ოპოზიციური განწყობები...

17.05.2010
                მანონ ბოკუჩავა, ქვემო ქართლი

რუსთავის მე-7 მიკრორაიონში დამონტაჟებული საარჩევნო ბანერები ქრისტიან-დემოკრატებს მეორე დღეს ჩამოყრილი და დასერილი დახვდათ. „ბანერები, რომელზეც გამოსახული იყო ამ ოლქში ჩვენი მაჟორიტარი, გიორგი მელიქიძე, დილით უკვე ჩამოყრილი და დასერილი იყო. ეს არაცივილური ბრძოლაა. თუ ვინმეს ჰგონია, რომ ამით ქალაქში ჩვენი რეიტინგი დაეცემა, ძალიან ცდება“, - ამბობს „ქრისტიან-დემოკრატების“ რუსთავის ოფისის ხელმძღვანელი ალეკო ახვლედიანი.
     
„ქრისტიან-დემოკრატების“ მაჟორიტარობის კანდიდატი, რომელსაც საკუთარი სახსრებით შეძენილი ბანერი გაუფუჭეს, ჩივის, რომ ეს უკვე მეორე შემთხვევაა.

„იგივე მოხდა მე-8 მიკრორაიონში. იქ უშუალოდ ველაპარაკეთ იმ ადამიანს, ვინც ეს გააკეთა და გვითხრა, რომ ამას „ნაციონალების“ სასარგებლოდ აკეთებდა. ვთხოვეთ, ბანერი მაინც დაებრუნებინა, მაგრამ მოგვიგო - უკვე დავხიეთო“.

განსხვავებული პრობლემები აქვთ „ნოღაიდელის პარტიის“ ქვემო ქართლის წევრებს. „მოძრაობა სამართლიანი საქართველოსთვის“ წარმომადგენელი ქვემო ქართლში ნუკრი შათირიშვილი ბოლნისში მათ მაჟორიტარობის კანდიდატზე ზეწოლაზე საუბრობს.

„ბოლნისის გამგებლის მოადგილე, რამინ ასადოვი ახორციელებს ადგილობრივ მოსახლეობაზე ზეწოლას. მისი პირდაპირი მუქარის შედეგად ჩვენმა კანდიდატმა, ბაირამ თანირვერდიევმა საკრებულოს წევრობაზე ბოლო დღეს უარი გვითხრა. ის ბოლნისის რაიონში აკაურთას საკრებულოში იყო ჩვენი კანდიდატი. ვფიქრობთ, რომ ეს ყველაფერი ყოფილი პროკურორის, ბოლნისის ახლანდელი გამგებლის პირდაპირი დავალებით ხდება. ასეთივე მუქარა განხორციელდა ბოლნისში ჩვენს კიდევ ერთ წარმომადგენელზე - შაქრო ფრუიძეზე. ახლახან გამოვიდა მისი შვილი ციხიდან და უთხრეს - უკან შევაბრუნებთო“, - საუბრობს შათირიშვილი.

„რესპუბლიკელების“ რუსთავის ოფისის ხელმძღვანელი ნინო ლომიძე საზოგადოებას სთხოვს, ყურადღება გაამახვილოს ამომრჩეველთა რაოდენობაზე.  

ლომიძე აღნიშნავს, რომ რუსთავში საოლქო-საარჩევნო კომისიის აპრილის მაჩვენებლებით, ამომრჩევლების რაოდენობა 98 786 იყო. ერთ თვეში კი რაოდენობა 105 990-მდე გაიზარდა. „ამომრჩეველთა რაოდენობა შვიდი ათასამდეა გაზრდილი. ეს რა ლოგიკაში ჯდება?!“

#20 რუსთავის საოლქო საარჩევნო კომისიის ხელმძღვანელი სოსო შველიძე ამ ფაქტს უცხოეთში მყოფი მოქალაქეების სიაში დატოვებით ხსნის. „თავიდან იყო საუბარი, რომ საზღვარგარეთ მყოფი ამომრჩევლები სიიდან უნდა ამოგვეღო, მიუხედავად იმისა, რომ აქ იყვნენ რეგისტრირებულნი. საბოლოოდ ცესკომ მიიღო, ჩემი აზრით, სამართლიანი გადაწყვეტილება და ისინი დატოვა სიაში. ამის შედეგად მივიღეთ ასეთი რაოდენობის ამომრჩეველი“, – ამბობს შველიძე.

ცესკოს მონაცემებით, 12 მაისის მდგომარეობით, მთელი ქვეყნის მასშტაბით, 37.000 ამომრჩეველი იმყოფება საზღვარგარეთ. თუ ჩავთვლით, რომ რუსთავში ამომრჩეველთა სია ასეთი კატეგორიის ხალხმა გაზარდა, გამოდის რომ 37 000 უცხოეთში გასული მოქალაქიდან 7204 რუსთაველია.

არჩევნებში მონაწილე სხვადასხვა პარტიები წინსასაარჩევნო დარღვევებზე ხშირად საუბრობენ. მათგან განსხვავებით, არაფერს ამბობს პარტია „ჩვენ თვითონ“. მეტიც, ეს პარტია, მიუხედავად თავისი ნაკლებად ხმაურიანი მუშაობისა, თვითმმართველობის არჩევნებში რუსთავში 14 მდივნით წარსდგება.

„აბსურდია საუბარი, რომ მდივნების თაობაზე ჩვენ „ნაციონალებს“ გავურიგდით და მათ სასრგებლოდ ვმოქმედებთ. თუმცა, ჩვენ არა ვართ რადიკალურად განწყობილი ხალხი. აბსოლუტურად ყველასთან - ოპოზიციასთანაც და სახელისუფლებო პარტიასთანაც ნორმალური ურთიერთობა გვაქვს“, – ამბობს პარტიის „ჩვენ თვითონ“ ქვემო ქართლის ოფისის ხელმძღვანელი, თამაზ ყალიჩავა.

კითხვაზე, როგორ შეაფასებს რეგიონში ხელისუფლების მუშაობას, ყალიჩავა გვპასუხობს:  „შეიძლება იყოს რაღაც მინუსები, მაგრამ ყველაფერი შესრულებადი და გამოსწორებადია. ჩვენი მიზანია მოვხვდეთ მთავრობაში და ჩვენი წვლილი შევიტანოთ საქმის კეთებაში“.
Print Send to Friend Send to Facebook Tweet This
დატოვეთ თქვენი კომენტარი
თქვენი სახელი:
თქვენი კომენტარი:

ქართულად
დამცავი კოდი: Code
სხვა სიახლეები
გამოკითხვა
არიან თუ არა ამჟამად საქართველოში პოლიტიკური პატიმრები?
დიახ არა არ ვიცი

ბლოგი

გორაშვილი vs ნაჭყებია
ივანე ჯავახიშვილის სახელობის თბილისის სახელმწიფო უნივერსიტეტის იურიდიული ფაკულტეტის ლექტორმა, გიორგი გორაშვილმა ამავე ფაკულტეტის სტუდენტს ბუბა ნაჭყებიას ფეისბუქის დახურულ ჯგუფში გინების გამო უჩივლა.
ვრცლად...
სიკვდილით სავსე ქალაქი
უგზო-უკვლოდ დაკარგულები - „არ დამივიწყო!“
არქივი
  

       

რედაქტორის აზრი

ხელისუფლებისგან მივიწყებული ვეტერანები
ყოველწლიურად მცირდება მეორე მსოფლიო ომის მონაწილეთა რაოდენობა. მათ შესახებ კი საზოგადოება მხოლოდ 9 მაისს იღებს ინფორმაციას, როდესაც ომის ვეტერანები, ტრადიციულად, გამარჯვების პარკში იკრიბებიან
ვრცლად...
უიმედოთა სოფელი
რა დაემართა სამართლიანობის აღდგენის ოცნებას
არქივი
თემები
კატეგორიები

Copyright © 2004 - 2019 HRIDC