ცხელ ხაზზე მოქალაქეებს თავად პროკურორები პასუხობენ
თბილისი.18.08.04.მედია-ნიუსი. გენერალურ პროკურატურაში მოქმედ ცხელ ხაზზე მოქალაქეებს შეუძლიათ სამართალდამცავი ორგანოების თანამშრომელთა მხრიდან უკანონობის ჩადენის შემთხვევაში ანონიმურად მიმართონ, თუმცა, ამის მიუხედავად, ბევრი მათგანი თანახმაა, პროკურატურისთვის ინფორმაციის მოწოდებისას თავისი ვინაობა გაამხილოს, - აცხადებს გენერალური პროკურორის მოადგილე ნონა წოწორია.
გენერალურ პროკურატურაში ცხელი ხაზი, რომლის ნომერია 99 74 10, 16 აგვისტოს ამოქმედდა და 24-საათიან რეჟიმში მუშაობს.
„ჩვენი მიზანია არა მხოლოდ ინფორმაციის შეგროვება, არამედ მათზე რეაგირება“, - განაცხადა წოწორიამ.
ცხელ ხაზზე მოქალაქეებს თავად პროკურორები პასუხობენ და საჭიროების შემთხვევაში ისინი მოქალაქეებს კონსულტაციებსაც უწევენ.
რეაგირება ხდება და მოხდება ყველა ინფორმაციაზე, მათ შორის პროკურორების მხრიდან ჩადენილ უკანონობაზე.