ტელეკომპანია „მზის“ ჟურნალისტს ბესლანი დაატოვებინეს
თბილისი.08.09.04.მედია-ნიუსი. ტელეკომპანია „მზის“ მოსკოვის ბიუროს ხელმძღვანელი ჟურნალისტი ზურაბ დვალი იძულებული გახდა ჩრდილოეთ ოსეთის ქალაქი ბესლანი დაეტოვებინა.
7 სექტემბერს, დაახლოებით 20.00 საათზე ბესლანიდან სატელევიზიო ჩართვის შემდეგ მისი ვინაობით ადგილობრივი მაცხოვრებლები დაინტერესდნენ. სიტყვიერი შეხლა-შემოხლის შემდეგ მათთან ოსი სამართალდამცველები მივიდნენ.
როგორც გაირკვა, ისინი გაღიზიანდნენ როცა შეიტყვეს რომ ზურაბ დვალი ქართული ტელეკომპანიის წარმომადგენელი იყო. 8 სექტემბერს 04.00 საათზე მას სასტუმროში მიაკითხეს ოსმა სამართალდამცველებმა, ყოველგვარი ახსნა-განმარტების გარეშე გაჩხრიკეს მისი პირადი ნივთები, ჩამოართვეს დოკუმენტები და აკრედიტაცია. მათ ზურაბ დვალს ურჩიეს ქალაქი დაეტოვებინა და საკუთარი მანქანით გადაიყვანეს ვლადიკავკაზში.
ზურაბ დვალი ჩრდილოეთ ოსეთის დედაქალაქიდან მოსკოვში ჩაფრინდა.