სახალხო დამცველმა არასამთავროები დარბაზში არ შეუშვა
თბილისი.29.09.04.მედია-ნიუსი. არასამთავრობო ორგანიზაცია „საზოგადოება და სამართალი“ და „თემთა კავშირი“ „თბილგაზის“ შესაძლო პრივატიზაციას აპროტესტებენ. ამ საკითხთან დაკავშირებით მათ სახალხო დამცველის ოფისში დაგეგმილი ჰქონდათ პრესკონფერენციის ჩატარება, მაგრამ ისინი დარბაზში არ შეუშვეს.
სახალხო დამცველის სოზარ სუბარის განმარტებით, აღნიშნულ არასამთავრობო ორგანიზაციებს „თბილგაზთან“ დაკავშირებით პრესკონფერენციის ჩატარება უნდოდათ, რის შესახებაც ის საქმის კურსში არ იყო. ამასთან, ეს საკითხი არ ეხება ადამიანის უფლებების დაცვის სფეროს და შესაბამისად, სახალხო დამცველის აპარატი ყველას დარბაზს ვერ დაუთმობს.
არასამთავრობოების განცხადებით, თბილისის პრემიერს „ფარული კავშირი აქვს ეკონომიკის სამინისტროსთან“, კერძოდ, ლაპარაკია „თბილგაზის“ აქციათა პაკეტის ეკონომიკის სამინისტროსთვის შესაძლო გადაცემაზე, რაც „თბილგაზის“ საპრივატიზაციო ნუსხაში შეყვანისა და მისი „გაზპრომისათვის“ გადაცემის საფუძველი გახდება.