სახალხო დამცველი პატიმრის ცემის ფაქტის გამოძიებას ითხოვს
თბილისი.14.12.04.მედია-ნიუსი. სახალხო დამცველი სოზარ სუბარი დაკავებული იაგო ნებიერიძის ცემის ფაქტზე გენერალურ ინსპექციას საქმის მოკვლევის რეკომენდაციით მიმართავს.
10 დეკემბერს სახალხო დამცველის წარმომადგენელმა შიდა ქართლში გიორგი არაყიშვილმა 22 წლის იაგო ნებიერიძე დროებითი დაკავების საკანში სასტიკად ნაცემი ნახა.
დაკავებული აცხადებდა, რომ ის ბრალის აღიარების მიზნით, გორის შინაგან საქმეთა სამმართველოს თანამშრომლებმა სასტიკად სცემეს. ამასთან, მას დაემუქრნენ, თუ ამ ფაქტს გაახმაურებდა სასტიკად გაუსწორდებოდნენ.
„მედია-ნიუსთან“ საუბრისას სახალხო დამცველის პრესმდივანმა სოფო კერესელიძემ განაცხადა, რომ იაგო ნებიერიძემ არ იცის მათი სახელები, ვინც იგი სცემა, მაგრამ აცხადებს, რომ მათი ამოცნობა არ გაუჭირდება.