აჭარის ყოფილი მაღალჩინოსანი შესაძლოა დააკავონ
ფინანსურმა პოლიციამ შესაძლოა აჭარის კიდევ ერთი ყოფილი მაღალჩინოსანი დააკავოს. სისხლის სამართლის საქმე „აღორძინების“ ყოფილი გენერალური მდივნის, ასლან აბაშიძის ახლო ნათესავის ოსიკო გვარიშვილის მიმართ აღიძრა. აჭარის პარლამენტის ყოფილ ვიცე სპიკერს ბრალი ბიუჯეტისადმი გადასახადების დამალვაში ედება. ფინანსურმა პოლიციამ დღეს მისი კუთვნილი უმაღლესი სასწავლებლიდან ბუღალტრული დოკუმენტაცია ამოიღო. ფინანსური პოლიციის მე-9 განყოფილების უფროსის მიხეილ მახარაძის განცხადებით ამ კომერციული სასწავლებლის სტუდენტები 1992 წლიდან წლიურად 100 ამერიკულ დოლარს იხდიდნენ, ბუღალტერიაში კი 100 ლარი ფიქსირდებოდა. ამასთან ამ წლების განმავლობაში გვარიშვილის თანამდებობრივი მდგომარეობის გამო საგადასახადო შემოწმება არ ჩატარებულა.
ფინანსურ პოლიციაში არ გამორიცხავენ ოსიკო გვარიშვილის დაკავებას, თუმცა ამ ეტაპზე იგი გამოძიებას ემალება.
ასლან აბაშიძის მარჯვენა ხელი დღემდე ბათუმის ეკონომიკის, სამართლის ფარმაციისა და სტომატოლოგიის ინსტიტუტის პრორექტორია. სასწავლებელში იგი რამოდენიმე დღეა არ გამოჩენილა.
ოსიკო გვარიშვილი ერთადერთია ასლან აბაშიძის უახლოესი გარემოცვიდან, რომლის ქონების კანონიერების საკითხით გენერალური პროკურატურა დღემდე არ დაინტერესებულა.
ნესტან ცეცხლაძე ბათუმიდან
ახალი ამბები
პოპულარული
რატომ ვერ იბრუნებენ კონფლიქტით დაზარალებული ოსები საქართველოს მოქალაქეობას და ქონებას?
სპეციალურ პენიტენციურ სამსახურს წამების მსხვერპლის სასარგებლოდ 50 000 ლარის გადახდა დაეკისრა
'ალბათ, ნებისმიერი რეგიონული ჟურნალისტი გეტყვით, რომ გადარჩენისთვის გვიწევს ბრძოლა!'
